मस्को । रुसी राष्ट्रपति भ्लादिमिर पुटिनले लामो समयदेखि जारी युक्रेन युद्ध अब अन्त्यको नजिक पुगेको महसुस आफूले गरेको बताएका छन्। दोस्रो विश्वयुद्धमा नाजी जर्मनीमाथि प्राप्त विजयको सम्झनामा आयोजित ‘विजय दिवस’ कार्यक्रमपछि क्रेम्लिनमा सञ्चारकर्मीहरूसँग कुरा गर्दै उनले शान्तिको आशा व्यक्त गरेका हुन्।
यद्यपि, उनले युक्रेनी राष्ट्रपति भोलोदिमिर जेलेन्स्कीसँगको भेटवार्ताका लागि कडा सर्त अघि सारेका छन्। पुटिनका अनुसार दुई नेताबीचको भेट तब मात्रै सम्भव हुनेछ, जब स्थायी शान्ति सम्झौतामा पूर्ण सहमति जुटिसकेको हुनेछ।
सन् २०२६ को विजय दिवस परेड विगतका वर्षहरूको तुलनामा निकै सीमित देखिएको छ। सामान्यतया रुसले सैन्य शक्ति प्रदर्शनका लागि ट्यांक र अत्याधुनिक हतियार सार्वजनिक गर्ने गरे पनि यसपटक रेड स्क्वायरमा त्यस्तो प्रदर्शन देखिएन।
बीबीसीका अनुसार कार्यक्रममा विदेशी सञ्चारमाध्यम र पत्रकारहरूको उपस्थिति पनि न्यून थियो। रुसी सञ्चारमाध्यमले विदेशी पत्रकारको उपस्थितिलाई उदारताको संकेतका रूपमा प्रस्तुत गरे पनि धेरै अन्तर्राष्ट्रिय सञ्चारमाध्यमलाई कार्यक्रममा सहभागी हुन अनुमति नदिइएको बताइएको छ।
युद्धकै बीचमा अमेरिकी राष्ट्रपति डोनाल्ड ट्रम्पको मध्यस्थतामा रुस र युक्रेनबीच तीन दिने युद्धविराम घोषणा गरिएको थियो। युद्धविराम अवधिमा दुवै देशले एक–एक हजार युद्धबन्दी साटासाट गर्ने योजना समेत बनाएका छन्।
तर, युद्धविरामको पहिलो दिनदेखि नै दुवै पक्षले एकअर्कामाथि सम्झौता उल्लंघन गरेको आरोप लगाइरहेका छन्। रुसी गणतन्त्र चेचेन्यासहित केही क्षेत्रमा युक्रेनी ड्रोन आक्रमणबाट मानिस घाइते भएका छन् भने युक्रेनतर्फ पनि रुसी आक्रमणबाट मानवीय क्षति भएको विवरण सार्वजनिक भएका छन्।
अमेरिकाले भने अझै पनि मध्यस्थताको प्रयास जारी राखेको छ। अमेरिकी विदेशमन्त्री मार्को रुबिओले रुस र युक्रेनबीच वार्ता गराउन वाशिङ्टन तयार रहेको बताएका छन्। तर उनले वार्तामा ठोस प्रगति नभए अमेरिकाले आफ्नो समय खेर नफाल्ने चेतावनी पनि दिएका छन्।
अहिले अमेरिकाको ध्यान मध्यपूर्वतर्फ पनि केन्द्रित भइरहेका बेला युक्रेन सङ्कट समाधानका लागि निर्णायक पहलको प्रतीक्षा भइरहेको छ। रुसको पूर्णस्तरको आक्रमणले लाखौँ मानिसको ज्यान जानुका साथै दुवै देशको अर्थतन्त्र र पूर्वाधारमा गम्भीर क्षति पुगेको सन्दर्भमा पुटिनको पछिल्लो अभिव्यक्तिलाई अर्थपूर्ण रूपमा हेरिएको छ।
