काठमाडौँ: अर्थ मन्त्रालयले अमेरिकी सहयोग नियोग (युएसएड) द्वारा सञ्चालित कार्यक्रमहरूबारे सञ्चारमाध्यम र सामाजिक सञ्जालमा आएका समाचार तथा टिप्पणीप्रति ध्यानाकर्षण भएको जनाएको छ।
मन्त्रालयका अनुसार, अमेरिकी राष्ट्रपतिबाट २० जनवरी २०२५ मा जारी कार्यकारी आदेशअनुसार नेपाल सरकारको बजेट प्रणालीमार्फत सञ्चालित शिक्षा, स्वास्थ्य, कृषि, र तथ्यांकसम्बन्धी चारवटा कार्यक्रमहरू ९० दिनका लागि रोकिएको छ। साथै, जैविक विविधता, प्रदेश तथा स्थानीय शासन सुदृढीकरण कार्यक्रम, र जलवायु उत्थानशील नगरपालिका सेवा कार्यक्रम डिजाइन प्रक्रियामा रहेकाले ती पनि उक्त आदेशबाट प्रभावित भएका छन्। मन्त्रालयले यी कार्यक्रमहरूको लागि सम्झौता नभइसकेको र कुनै आर्थिक सहयोग प्राप्त नभएको स्पष्ट पारेको छ।
नेपालको आर्थिक, सामाजिक, र पूर्वाधार विकासमा संयुक्त राज्य अमेरिकाले लामो समयदेखि सहयोग गर्दै आएको मन्त्रालयले जनाएको छ। युएसएडमार्फत नेपालमा सन् १९५१ देखि निरन्तर अनुदान सहायता प्रदान गर्दै विभिन्न कार्यक्रम सञ्चालन हुँदै आएका छन्।
