काठमाडौं: अब संयुक्त अरब इमिरेट्स (युएई) मा कार्यरत नेपाली श्रमिकहरूले श्रम स्वीकृति लिन नेपाल आउनु नपर्ने भएको छ। सरकारले युएईबाटै श्रम स्वीकृति प्रदान गर्ने व्यवस्था मिलाएको छ। बिहीबार दुबईमा आयोजित एक कार्यक्रममार्फत श्रम, रोजगार तथा सामाजिक सुरक्षामन्त्री शरत्सिंह भण्डारीले उक्त सेवाको शुभारम्भ गर्नुभयो।
अबुधाबीस्थित नेपाली राजदूतावासका अनुसार मन्त्री भण्डारीले वैदेशिक रोजगारीमा रहेका नेपाली श्रमिकहरूको सुविधालाई ध्यानमा राख्दै सेवा प्रवाहलाई सहज, सरल र प्रविधिमैत्री बनाउने सरकारको लक्ष्य रहेको बताउनुभयो।
उहाँका अनुसार अब सम्बन्धित नेपाली राजदूतावासबाटै श्रम स्वीकृति लिन सकिने भएकाले नेपाल फर्कनुपर्ने झन्झट हट्नेछ। यसले श्रमिकहरूलाई समय र खर्च बचत गर्दै आफ्नो पेशा तथा व्यवसायलाई निरन्तरता दिन सहज हुनेछ।
नेपाली श्रमिकका लागि ठूलो राहत
मन्त्री भण्डारीले क्रमशः अन्य देशका नेपाली दूतावासहरूबाट पनि श्रम स्वीकृति सेवा उपलब्ध गराइने बताउनुभयो। उहाँले नेपाल सरकारले वैदेशिक रोजगारीलाई व्यवस्थित गर्न, श्रमिकको हक, हित र संरक्षणका लागि नीतिगत सुधार गर्न, तथा समयानुकूल सेवा प्रवाह गर्न प्रतिबद्ध रहेको उल्लेख गर्नुभयो।
युएईका लागि नेपालका राजदूत तेजबहादुर क्षेत्रीले दूतावासले नेपाली श्रमिकहरूको हितमा विभिन्न पहलहरू गरिरहेको जानकारी गराउँदै अबुधाबीस्थित दूतावासबाटै अनलाइन श्रम स्वीकृति सेवा उपलब्ध भएपछि श्रमिकहरूलाई सेवा लिन झन् सहज हुने बताउनुभयो।
उहाँले सीमित स्रोतसाधनका बाबजुद पनि नेपाली श्रमिकलाई प्रभावकारी सेवा प्रदान गर्न दूतावास प्रतिबद्ध रहेको उल्लेख गर्नुभयो। साथै, दूतावासका अन्य सेवाहरूलाई पनि अनलाइन प्रणालीबाट सहज बनाइँदै आएको जानकारी दिनुभयो।
दुबईमा श्रमिकहरूसँग अन्तक्र्रिया
श्रम स्वीकृति सेवाको शुभारम्भ कार्यक्रममा गैरआवासीय नेपाली सङ्घ (NRNA) युएई, नेपाली समाज युएई, तथा विभिन्न सङ्घसंस्थाका प्रतिनिधिहरूको उपस्थिति थियो।
NRNA युएईका अध्यक्ष विकास शाही र नेपाली समाज युएईका अध्यक्ष राम मोक्तानले कार्यक्रममा श्रमिकहरूसँगको अन्तरक्रियाका क्रममा श्रम स्वीकृति प्रक्रियालाई अझ सहज र प्रभावकारी बनाउने विषयमा आ–आफ्ना विचार राख्नुभएको थियो।
अबुधाबी मस्कटपछि दोस्रो श्रम स्वीकृति दिने दूतावास
श्रम स्वीकृति सेवा प्रदान गर्ने अबुधाबी दूतावास, मस्कटपछि दोस्रो नेपाली दूतावास बनेको छ।
वल्र्ड गभर्नमेन्ट समिटमा नेपालको सहभागिता
यसैबीच, गत माघ २९ देखि फागुन १ गतेसम्म युएईमा आयोजित ‘वल्र्ड गभर्नमेन्ट समिट २०२५’ मा मन्त्री भण्डारीले नेपालको प्रतिनिधित्व गर्नुभयो।
समिटमा ३० भन्दा बढी राष्ट्रप्रमुख तथा सरकार प्रमुखको सहभागिता रहेको थियो, जहाँ १४० देशका सरकारी प्रतिनिधि, अन्तर्राष्ट्रिय तथा क्षेत्रीय सङ्घसंस्थाका सदस्य, बौद्धिक तथा प्राज्ञिक क्षेत्रका विशेषज्ञ, उद्योग वाणिज्य क्षेत्रका प्रतिनिधि तथा करिब ६,००० व्यक्ति सहभागी थिए। समिटमा बागमती प्रदेशका मुख्यमन्त्री बहादुरसिंह लामाले पनि भाग लिनुभएको थियो।
