काठमाडौं — थापाथलीस्थित बागमती नदी किनारको सुकुम्बासी बस्ती खाली गराउने कार्य यसपटक विगतभन्दा फरक र मानवीय ढंगले अघि बढाइएको छ। स्थानीय बासिन्दाको खाद्यान्न, लत्ताकपडा तथा घरायसी सामग्री सुरक्षित स्थानमा सार्न नेपाल प्रहरी स्वयं सक्रिय रूपमा जुटेको देखिएको छ।
बस्ती खाली गराउने क्रममा कुनै अप्रिय घटना नहोस् भन्ने उद्देश्यले प्रशासनले उच्च सतर्कता अपनाएको छ। सोहीअनुसार नेपाल प्रहरी र सशस्त्र प्रहरी बलको ठूलो सङ्ख्या परिचालन गरिएको छ। तर यसपटकको दृश्य विगतका झडप र तनावपूर्ण अवस्थाभन्दा बिल्कुल फरक देखिएको छ।
स्थानीयका अनुसार, सुरक्षाकर्मीहरूले केवल बस्ती खाली गराउने मात्र नभई उनीहरूको दुःखमा साथ दिने काम पनि गरिरहेका छन्। घरभित्र रहेका सामान निकाल्नदेखि बोकेर सुरक्षित स्थानसम्म पुर्याउनसम्म सुरक्षाकर्मीहरू आफैं खटिएका छन्। विशेषगरी वृद्ध, महिला र बालबालिकालाई प्राथमिकता दिँदै उनीहरूको दैनिक जीवनसँग जोडिएका अत्यावश्यक सामग्री जोगाउन सहयोग गरिएको छ।
प्रशासनले शान्तिपूर्ण रूपमा व्यवस्थापन गर्ने रणनीति अपनाएको बताउँदै कुनै पनि प्रकारको झडप हुन नदिन संवाद र समन्वयलाई प्राथमिकता दिएको जनाएको छ। यसले स्थानीयमा केही हदसम्म भरोसा पनि बढाएको छ।
थापाथली क्षेत्रको यो दृश्यले एकातिर राज्यको कानुनी कार्यान्वयन देखाउँछ भने अर्कोतर्फ सुरक्षाकर्मीहरूको मानवीय पक्ष पनि उजागर गरेको छ।
