मुग्लिन–पोखरा सडक योजनाअन्तर्गत तनहुँको मादी नदीमा निर्माण भइरहेको चार लेनको आर्क डिजाइन पुलको ४५ प्रतिशत काम पूरा भएको छ। व्यास नगरपालिका ४ र ५ लाई जोड्ने यो पुल निर्माण कार्यलाई तीव्रता दिइएको मुग्लिन–पोखरा सडक योजना (पूर्वी खण्ड) ले जनाएको छ।
इन्जिनियर विष्णुप्रसाद पाण्डेका अनुसार, ३१५ मिटर लामो यो पुलमा ६ वटा ‘स्पान’ रहनेछ। सन् २०२२ अगस्ट ११ मा रु. १ अर्ब २१ करोडको लागतमा निर्माण सम्झौता भएको यस पुलको काम तीन वर्षभित्र पूरा गर्ने लक्ष्य राखिएको छ। ठेक्का जेडआइष्ट अन्नक जेभीले लिएको हो।
हाल सञ्चालनमा रहेको ३७० मिटर लम्बाइको दुई लेनको पुलबाट करिब ५० मिटर टाढा नयाँ पुल निर्माण भइरहेको छ। पृथ्वी राजमार्गको सबैभन्दा लामो आर्क डिजाइनको यो पुल निर्माण कार्य दिनरात दुई सिफ्टमा भइरहेको छ। निर्माण कम्पनीका प्रतिनिधि दिनेश श्रेष्ठले कामको गति अहिलेकै रूपमा जारी रहे समयअघि नै निर्माण सम्पन्न हुने विश्वास व्यक्त गर्नुभएको छ।
मुग्लिन–पोखरा सडक योजनाको पूर्वी खण्डअन्तर्गत आँबुखैरेनीदेखि जामुनेसम्मका १३ पुल निर्माण भइसकेका छन्। हाल मादी नदी, बुल्दी खोला, बन्दीपुरको नाला, र आँबुखैरेनीको खानी खोलामा ठूला पुल निर्माण जारी छन्।
