बुटवल: भैरहवास्थित गौतम बुद्ध अन्तर्राष्ट्रिय विमानस्थलबाट केही सातायता नियमित उडान भर्दै आएको कतार एयरवेजले आफ्नो उडान स्थगित गरेको छ।
गत कार्तिक २७ गतेदेखि कतार एयरवेजले वाइडबडी विमान एयरबस ३३० मार्फत दोहा–भैरहवा–काठमाडौँ–दोहा रुटमा दैनिक व्यावसायिक उडान गर्दै आएको थियो।
गौतम बुद्ध विमानस्थलका सूचना अधिकारी विनोदकुमार रावतका अनुसार एयरवेजले आइतबारदेखि नयाँ उडानका लागि अनुमति नमागेको बताएका छन्। उनले भने, “नोभेम्बर ३० सम्म मात्र अनुमति थियो। नयाँ के गर्ने हो, अहिले भन्न सकिन्न।”
नेपाल नागरिक उड्डयन प्राधिकरणले मङ्सिर १६ पछि उडानका लागि प्रस्ताव पेस गर्न इमेलमार्फत पत्राचार गरे पनि एयरवेजले भैरहवाबाट उडानबारे उच्चस्तरमा छलफल गरेर निर्णय गर्ने भन्दै कुनै स्पष्ट जवाफ दिएको छैन। हालसम्म थप अनुमतिको लागि प्रस्ताव समेत आएको छैन।
गौतम बुद्ध अन्तर्राष्ट्रिय विमानस्थल कार्यालयका अनुसार, यस अवधिमा कतार एयरवेजले भैरहवाबाट ३८ वटा उडान–अवतरण गरेको थियो।
यस क्षेत्रका पर्यटन व्यवसायीहरूले कतार एयरवेजको उडानलाई नियमित बनाउनुपर्ने माग गर्दै आवाज उठाएका छन्। हाल भैरहवा विमानस्थलबाट नेपाल एयरलाइन्स, जजिरा एयरवेज, फ्लाई दुबई र थाई एयर एसियाले नियमित उडान भर्दै आएका छन्।
कतार एयरवेजको उडान स्थगित भएपछि व्यवसायीहरू पुनः निराश बनेको नाटा लुम्बिनी प्रदेशका पूर्वअध्यक्ष सागर अधिकारीले बताए।
