काठमाडौं। फागुन २१ गते हुने प्रतिनिधिसभा सदस्य निर्वाचन नजिकिँदै जाँदा भक्तपुर निर्वाचन क्षेत्र नम्बर १ मा राजनीतिक गतिविधि तीव्र बनेको छ। परम्परागत रूपमा नेपाल मजदुर किसान पार्टी (नेमकिपा)को बलियो पकड रहेको यस क्षेत्रमा यसपटक प्रतिस्पर्धा थप चर्किने संकेत देखिएको छ।
भक्तपुर नगरपालिका र चाँगुनारायण नगरपालिकाका १९ वटा वडा समेटिएको यस क्षेत्रमा ५२ हजार ६६ पुरुष र ५४ हजार ९८८ महिला गरी कुल १ लाख ७ हजार ४४ मतदाता रहेका छन्। यहाँ २५ जना उम्मेदवार चुनावी मैदानमा छन्, जसमध्ये १६ जना विभिन्न राजनीतिक दलका र ९ जना स्वतन्त्र उम्मेदवार हुन्।
भक्तपुर–१ लाई लामो समयदेखि नेमकिपाको गढ मानिन्छ। २०४८ सालदेखि हालसम्म भएका सबै संसदीय निर्वाचनमा नेमकिपाले लगातार जित हासिल गर्दै आएको छ। पार्टीका अध्यक्ष नारायणमान बिजुक्छेले २०४८ देखि २०७० सम्म लगातार जित हासिल गरेका थिए भने २०७४ र २०७९ सालमा प्रेम सुवाल विजयी भएका थिए। २०७९ को निर्वाचनमा सुवालले ४२ हजार ७६१ मत ल्याएर फराकिलो अन्तरले विजय हासिल गरेका थिए।
यद्यपि यसपटक बहुदलीय प्रतिस्पर्धा विस्तार भएको छ। नेपाली कांग्रेसबाट किरण न्यौपाने, एमालेबाट सोमप्रसाद मिश्र, रास्वपाबाट रुकेश रन्जित, राप्रपाबाट भरतबहादुर खड्का र माओवादी केन्द्रबाट चन्द्रमान कोजु लगायतका उम्मेदवार सक्रिय प्रचारमा छन्। साथै, स्वतन्त्र उम्मेदवारहरूको उल्लेखनीय उपस्थितिले पनि प्रतिस्पर्धालाई थप रोचक बनाएको छ।
मतदाताको संरचनामा आएको परिवर्तन, नयाँ पुस्ताको सहभागिता र विकास तथा रोजगारीका मुद्दाले निर्वाचनको समीकरण बदलिन सक्ने विश्लेषण गरिएको छ। विपक्षी दलहरूले विकासको गति अपेक्षित नभएको तर्क गर्दै आर्थिक अवसर विस्तारमा जोड दिएका छन्।
यसपटक नेमकिपाले आफ्नो परम्परागत वर्चश्व कायम राख्ने कि विपक्षी दलहरूले कडा चुनौती दिने भन्ने विषय मतदाताको निर्णयमा निर्भर रहने देखिएको छ।
