धनगढी । बैतडीमा नेकपा एमाले र राष्ट्रिय स्वतन्त्र पार्टी (रास्वपा) का कार्यकर्ताबीच झडप हुँदा एमालेका दुई जना कार्यकर्ता घाइते भएका छन्।
प्रहरीका अनुसार निर्वाचन प्रचारप्रसारका क्रममा घरदैलो कार्यक्रम सञ्चालन भइरहेका बेला डिलासैनी गाउँपालिका–७ अन्तर्गत लेक टोलमा दुवै पक्षका कार्यकर्ताबीच विवाद बढ्दै झडप भएको हो।
जिल्ला प्रहरी कार्यालय बैतडीका प्रवक्ता प्रहरी निरीक्षक सुरज सिंहका अनुसार झडपमा परी डिलासैनी–७ निवासी एमाले निकट युवा संघका जिल्ला सदस्य जनक धामी र सोही ठाउँका माधव धामी घाइते भएका छन्।
प्रहरीका अनुसार जनक धामीको टाउको र निधारमा चोट लागेको छ भने माधव धामीको ढाड र दाहिने खुट्टामा चोट लागेको छ। दुवै जनाको गोकुलेश्वर अस्पताल, दार्चुलामा उपचार भइरहेको छ।
घटनापछि प्रहरीले रास्वपाका पाँच जना कार्यकर्तालाई नियन्त्रणमा लिएको जनाएको छ। घटनाबारे थप अनुसन्धान भइरहेको प्रहरीले जनाएको छ।
