भुरुङ–तातोपानी (म्याग्दी): नेकपा (माओवादी केन्द्र)का अध्यक्ष तथा पूर्वप्रधानमन्त्री पुष्पकमल दाहाल ‘प्रचण्ड’ले कालीगण्डकी कोरिडोरअन्तर्गत बेनी–जोमसोम सडकमा पहिरो नियन्त्रण र वैकल्पिक मार्गको व्यवस्था गर्न पहल गर्ने प्रतिबद्धता जनाउनुभएको छ।
चीन र भारत जोड्ने राष्ट्रिय प्राथमिकताको कालीगण्डकी कोरिडोरअन्तर्गत पर्वतको मालढुङ्गादेखि म्याग्दी खण्डसम्मको स्थलगत निरीक्षणका क्रममा म्याग्दीको रघुगङ्गा गाउँपालिका–२ बैसरीमा सरोकारवालासँगको भेटमा अध्यक्ष दाहालले निर्माणाधीन सडकलाई पूर्णता दिन तथा पहिरो र नदी कटानको रोकथाम गरी सडकलाई सुरक्षित बनाउनेतर्फ आफ्नो ध्यान केन्द्रित भएको बताउनुभयो।
रघुगङ्गा गाउँपालिका–२ स्थित वरखर्कको पहिरो निरीक्षणपछि अध्यक्ष दाहालले पहिरो नियन्त्रण र नियमित यातायात सञ्चालनका लागि वैकल्पिक मार्गको स्तरोन्नति गर्न संसद् र सरकारको ध्यानाकर्षण गराउने प्रतिबद्धता व्यक्त गर्नुभयो।
यसै अवसरमा रघुगङ्गा–२ का पूर्ववडाध्यक्ष तथा माओवादी केन्द्र गण्डकी प्रदेश सदस्य रिमबहादुर कटुवालले बरखर्क पहिरोको विकल्पस्वरूप गलेश्वर–बगैंचा–रानीपौवा–रिसिनचौतारी–बेगखोला सडक स्तरोन्नति गरी वर्षायाममा नियमित यातायात सुनिश्चित गर्न सकिने मागसहित अध्यक्ष दाहाललाई ज्ञापनपत्र बुझाउनुभयो।
यस्तै, अन्नपूर्ण गाउँपालिका–२, भुरुङ तातोपानीमा स्थानीयको गुनासो सुन्दै अध्यक्ष दाहालले म्याग्दीको भगवती, दोवालगायत क्षेत्रका गुठी र सिमाना सम्बन्धी समस्या समाधानमा पनि पहल गर्ने आश्वासन दिनुभयो।
त्यस क्रममा अन्नपूर्ण गाउँपालिका–५ का वडासदस्य तथा माओवादी केन्द्र अन्नपूर्ण गाउँ कमिटी अध्यक्ष पूर्ण पाइजा र इञ्चार्ज बागवीर पाइजाले स्थानीय विकास निर्माणसँग सम्बन्धित मागहरू अध्यक्ष दाहाललाई बुझाउनुभएको थियो।
