मनिला । फिलिपिन्सको मध्य भागस्थित समर टापु सोमबार शक्तिशाली भूकम्पले हल्लिँदा स्थानीय बासिन्दामा त्रास फैलिएको छ। अमेरिकी भूगर्भीय सर्वेक्षण (युएसजीएस) का अनुसार दिउँसो २:०९ बजे गएको भूकम्पको तीव्रता ६.० म्याग्निच्युड मापन गरिएको छ।
भूकम्प समर प्रान्तको तटीय सहर सान जुलियनबाट करिब नौ किलोमिटर टाढा ७३.३ किलोमिटर गहिराइमा केन्द्रित रहेको जनाइएको छ। गहिराइ बढी भएकाले ठूलो क्षति हुनबाट जोगिएको अनुमान गरिएको छ।
स्थानीय प्रहरीका अनुसार भूकम्प अचानक र निकै शक्तिशाली महसुस गरिएको थियो। प्रहरी कार्यालयमै छतसँग जोडिएको एक बीम भाँचिएको र केही फर्निचर हल्लिएको बताइएको छ। सम्भावित परकम्पको जोखिमका कारण कर्मचारीहरू बाहिर बसेर सतर्कता अपनाइरहेका छन्।
हालसम्म मानवीय क्षति वा गम्भीर चोटपटकको कुनै आधिकारिक विवरण प्राप्त नभएको जनाइएको छ। यद्यपि भूकम्पले स्थानीय स्तरमा डर र असुरक्षाको वातावरण सिर्जना गरेको छ।
फिलिपिन्स भूकम्पीय दृष्टिले संवेदनशील क्षेत्र हो, किनकि यो प्रशान्त महासागरको ‘रिङ अफ फायर’ भित्र पर्दछ, जहाँ पृथ्वीका प्लेटहरू सक्रिय रहने भएकाले बारम्बार भूकम्प आउने गर्छ।
यसअघि पनि त्यहाँ विभिन्न शक्तिशाली भूकम्पहरू जाँदा जनधनको ठूलो क्षति भएको थियो, जसले भूकम्पीय जोखिम अझै कायम रहेको देखाउँछ।
