बैङ्कक: थाइल्याण्डको औपचारिक भ्रमणमा रहनुभएका प्रधानमन्त्री केपी शर्मा ओली र उहाँका थाइ समकक्षी पे थोङ् थान् शिनावातबीच आज भेटवार्ता हुँदैछ। भेटवार्ताअघि प्रधानमन्त्री ओली समकक्षी शिनावातले आयोजना गर्नुभएको स्वागत समारोहमा सहभागी हुनुभएको छ।
थाइल्याण्डका प्रधानमन्त्री शिनावातको मैत्रीपूर्ण निमन्त्रणामा नेपालका प्रधानमन्त्रीको यो पहिलो औपचारिक भ्रमण हो। यस भ्रमणबाट दुई देशबीचको आपसी सम्बन्ध सुदृढ गर्दै सहकार्यलाई प्रवर्द्धन गर्ने अपेक्षा गरिएको छ। परराष्ट्र मन्त्रालयका अनुसार भेटवार्तापछि संस्कृति तथा पर्यटन क्षेत्रसम्बन्धी सहकार्यका लागि सम्झौतापत्रमा हस्ताक्षर हुनेछ। साथै, दुई देशका गैरसरकारी तथा व्यावसायिक संस्थाबीच विभिन्न छ सहमतिपत्र आदानप्रदान गरिने छ।
सम्झौतापछि दुवै प्रधानमन्त्रीले संयुक्त पत्रकार सम्मेलन गर्ने कार्यक्रम छ। त्यसपछि प्रधानमन्त्री ओली आफ्नो सम्मानमा समकक्षी शिनावातले आयोजना गर्नुभएको दिवभोजमा सहभागी हुनुहुनेछ। साथै, प्रधानमन्त्री ओलीले आजै थाइल्याण्डका राजा महा बजिरालोङ्कर्नसँग शिष्टाचार भेट गर्नुहुनेछ।
प्रधानमन्त्री ओली मङ्गलबार अपराह्न थाइल्याण्डको औपचारिक भ्रमणका क्रममा यहाँ आइपुग्नुभएको हो।
