बैंकक: प्रधानमन्त्री केपी शर्मा ओली औपचारिक भ्रमणका लागि थाइल्याण्ड पुगेका छन्। उनी बहुक्षेत्रीय प्राविधिक तथा आर्थिक सहयोगका लागि बंगालको खाडीको प्रयास (बिमस्टेक)को छैटौं शिखर सम्मेलनमा भाग लिन बैंकक आइपुगेका हुन्।
प्रधानमन्त्री ओली मंगलबार साँझ स्थानीय समयअनुसार ६:१५ बजे बैंकक अवतरण गरेका थिए। सुवर्णभूमि अन्तर्राष्ट्रिय विमानस्थलस्थित विशिष्ट कक्षमा थाइल्याण्डका उपप्रधानमन्त्री तथा यातायातमन्त्री सुरिया जङ्ग्राउनग्रेङकिट, संस्कृति तथा खेलकुदमन्त्री सोरावोङ थेनबोङ, थाइल्याण्डका लागि नेपाली राजदूत धनबहादुर वली र नेपालका लागि थाइल्याण्डका राजदूत सावापोङ सिरिसोर्नसहितको टोलीले उनलाई स्वागत गर्यो।
थाइल्याण्डका प्रधानमन्त्री पे थोङ् थान् शिनावातको मैत्रीपूर्ण निमन्त्रणामा नेपाली प्रधानमन्त्रीको यो पहिलो औपचारिक भ्रमण हो।
प्रधानमन्त्री ओलीको भ्रमण टोलीमा प्रथम महिला राधिका शाक्य, परराष्ट्रमन्त्री डा. आरजु राणा देउवा, प्रधानमन्त्रीका मुख्य सल्लाहकार विष्णुप्रसाद रिमाल, आर्थिक–विकास सल्लाहकार डा. युवराज खतिवडा, नेपाल सरकारका मुख्यसचिव एकनारायण अर्याल, परराष्ट्र मन्त्रालयका सचिव अमृतबहादुर राईलगायत सहभागी छन्।
