काठमाडौं: प्रतिनिधिसभाको बैठक बुधबार दिउँसो १:०० बजेसम्मका लागि स्थगित गरिएको छ। संसद बैठक आज केही समयको लागि सञ्चालन भए पनि विपक्षी दलहरूको अवरोधका कारण स्थगन गरिएको हो।
सभामुख देवराज घिमिरेले बैठक सुरु भएको जानकारी दिएलगत्तै माओवादी केन्द्र, राष्ट्रिय स्वतन्त्र पार्टीलगायतका विपक्षी दलका सांसदहरूले होहल्ला गर्दै अवरोध गरे। सभामुख घिमिरेले दलका तर्फबाट बोल्न अनुमति दिने बताएका थिए, तर विपक्षी सांसदहरूको निरन्तर अवरोधका कारण बैठकलाई सुरु भएको केहीबेरमै आधा घन्टाका लागि स्थगित गरिएको थियो।
स्थगनको बीचमा सहमति कायम गर्न प्रयास भए पनि निष्कर्षमा पुग्न नसकेपछि बैठक बुधबार १:०० बजेसम्मका लागि पुनः स्थगित गरिएको हो।
विपक्षी दलहरूले भिजिट भिसा प्रकरणमा गृहमन्त्री रमेश लेखकको राजीनामा र छानबिन समिति गठनको माग गर्दै प्रतिनिधिसभा अवरुद्ध गर्दै आएका छन्। संसद बैठक गत जेठ १३ गतेदेखि निरन्तर अवरोधमा पर्दै आएको छ।
