काठमाडौं । जेनजी आन्दोलनपछि हुन लागेको प्रतिनिधिसभा निर्वाचनमा अब १४ दिन मात्र बाँकी रहेको छ। निर्वाचनको तयारीलाई तीव्र पार्दै निर्वाचन आयोग ले प्रतिनिधिसभा सदस्य निर्वाचनअन्तर्गत समानुपातिक निर्वाचन प्रणालीका लागि आवश्यक अस्थायी मतदाता नामावली संकलन तथा स्थायी मतदान प्रक्रियालाई व्यवस्थित बनाउन ‘अस्थायी मतदाता नामावलीसम्बन्धी कार्यविधि २०८२’ जारी गरेको छ।
आयोगले मतदाता नामावलीसम्बन्धी ऐन, २०७३ को दफा ४४ ले दिएको अधिकार प्रयोग गर्दै उक्त कार्यविधि लागू गरेको जनाएको छ। कार्यविधिअनुसार आयोगले स्थायी मतदाता नामावली संकलन कार्यक्रमसहितको सूचना प्रकाशन गर्नेछ। आवश्यकताअनुसार सो सूचना राष्ट्रियस्तरका सञ्चारमाध्यममार्फत प्रकाशन तथा प्रसारण गर्न सकिने व्यवस्था गरिएको छ।
नेपाल सरकार, प्रदेश सरकार र स्थानीय तहका कर्मचारी, सरकारको स्वामित्व वा नियन्त्रणमा रहेका संस्थाका कर्मचारी, सेना, प्रहरी, कारागारमा रहेका थुनुवा तथा कैदी, निर्वाचन कार्यमा खटिएका कर्मचारी र सुरक्षाकर्मी तथा संवैधानिक निकायका प्रमुख र पदाधिकारीको नाम स्थायी मतदाता नामावलीमा समावेश गरिनेछ।
कार्यविधिअनुसार कुनै व्यक्तिको नाम छुटेको वा विवरणमा त्रुटि देखिएमा सम्बन्धित व्यक्तिले प्रमाणसहित प्रमुख नाम दर्ता अधिकारीसमक्ष निवेदन दिई नाम समावेश गराउन वा त्रुटि सच्याउन सक्ने व्यवस्था रहेको आयोगले जनाएको छ।
