पोखरा: २०३४ सालदेखि छोरेपाटन माविले सञ्चालन गर्दै आएको पाताले छाँगो (डेभिज फल) अब पोखरा महानगरपालिकाले आफ्नै व्यवस्थापनमा सञ्चालन गर्ने भएको छ।
आइतबार सम्पन्न सर्वपक्षीय बैठकले पाताले छाँगोको स्वामित्व महानगरले लिने निर्णय गरेको हो। लामो समयसम्म निजी क्षेत्रलाई ठेक्का दिने महानगरको अघिल्लो निर्णयले सरोकारवालाहरूको आलोचना खेप्नुपरेको थियो।
छोरेपाटन माविले छाँगोको व्यवस्थापन विद्यालयले नै गर्नुपर्ने दाबी गर्दै आएको थियो। तर, माघ १ गते महानगरपालिकाले छाँगोमा ताला लगाएको थियो। विद्यालयले पनि ताला लगाउने प्रतिक्रिया दिएपछि पाताले छाँगो अवलोकन गर्न आएका पर्यटकहरू गेटबाटै फर्किन बाध्य भए।
बैठकले दुबै पक्षले लगाएका तालाहरू तत्काल खोल्ने र महानगरले आफ्नै कर्मचारीमार्फत प्रवेश शुल्क संकलन गर्ने निर्णय गरेको छ।
महानगरको निर्णय
बैठकले डेभिज फल महानगरले कानुनअनुसार पर्यटन शुल्क संकलन गर्दै सञ्चालन गर्ने, पर्यटकका लागि छाँगो खुला राख्ने, र महालेखा परीक्षकको कार्यालयले औँल्याएको बेरुजु फछ्यौटका लागि आवश्यक प्रक्रिया अघि बढाउने निर्णय गरेको छ। साथै, स्कुलले छाँगोको आम्दानी लिने अभ्यासलाई कानुनविपरीत ठहर गरेको छ।
मेयर धनराज आचार्यका अनुसार, “डेभिज फलको व्यवस्थापनलाई पारदर्शी बनाउँदै सम्बन्धित पक्षसँग छलफल गरेर अगाडि बढ्ने योजना रहेको छ।”
छलफल र आगामी प्रक्रिया
२०७८ साउन १४ मा महानगरले ४० वर्षका लागि पाताले छाँगो निजी क्षेत्रलाई जिम्मा दिने सम्झौता गरेको थियो। सम्झौताअनुसार, सेती क्यानोन प्रालिले सिसाको पुल निर्माण र अन्य पर्यटकीय पूर्वाधार थप गर्ने योजना थियो। तर, सम्झौताको अवधि, रोयल्टी व्यवस्थापन, र परियोजनाका अन्य पक्षहरूलाई लिएर सरोकारवालाहरूले आलोचना गरेका थिए।
मेयर आचार्यले भने, “आलोचना भएका क्षेत्रहरूलाई सम्बोधन गर्न सम्बन्धित कम्पनी र सरोकारवालासँग व्यापक छलफल गरी योजना अघि बढाइने छ।”
बैठकमा सहभागीहरू
बैठकमा मेयर आचार्य, उपमेयर मञ्जुदेवी गुरुङ, प्रमुख प्रशासकीय अधिकृत शिवराज चौलागाईं, कास्कीका प्रमुख जिल्ला अधिकारी भरतमणि पाण्डे, सुरक्षानिकायका प्रमुखहरू, वडा नम्बर १७ का अध्यक्ष राधिका कुमारी शाही योगी, छोरेपाटन माविका प्रधानाध्यापक, विद्यालय व्यवस्थापन समितिका अध्यक्षहरू, र कास्कीका विभिन्न राजनीतिक दलका प्रतिनिधिहरू सहभागी थिए।
माघ ११ मा रातोपाटीले पोखराका सम्पदा व्यवस्थापनमा देखिएको बेथितिबारे विशेष सामग्री प्रकाशित गरेको थियो।
