काठमाडौं । हाल नेपालमा उपल्लो वायुमण्डलमा सक्रिय पश्चिमी न्यून चापीय रेखा तथा स्थानीय वायुको प्रभाव कायम रहेको छ। यसको असरका कारण देशका विभिन्न क्षेत्रमा मौसममा बदली, वर्षा तथा हिमपातको सम्भावना देखिएको छ।
हाल कोशी र सुदूरपश्चिम प्रदेशसहित देशका हिमाली तथा पहाडी भूभागमा सामान्यदेखि आंशिक बदली रहेको छ भने बाँकी भूभागमा आंशिक बदली देखिएको छ। कोशी प्रदेशका केही स्थान तथा बागमती, गण्डकी, लुम्बिनी, कर्णाली र सुदूरपश्चिम प्रदेशका एक–दुई स्थानमा मेघगर्जन, चट्याङसहित हल्कादेखि मध्यम वर्षा भइरहेको छ।
मौसम पूर्वानुमान अनुसार आज दिउँसो हिमाली तथा पहाडी भूभागमा सामान्य बदली रहनेछ भने तराई क्षेत्रमा आंशिक बदली रहने सम्भावना छ। हिमाली तथा पहाडी भूभागका केही स्थान र लुम्बिनी तथा सुदूरपश्चिमका तराईका एक–दुई स्थानमा मेघगर्जन र चट्याङसहित मध्यम वर्षा हुन सक्ने अनुमान गरिएको छ। साथै, उच्च हिमाली क्षेत्रमा हिमपातको सम्भावना पनि रहेको छ।
यता, मधेश प्रदेश तथा कोशी प्रदेशको तराई क्षेत्रमा गर्मी बढ्ने र तातो दिनको अवस्था कायम रहने सम्भावना रहेको मौसमविद्हरूले बताएका छन्।
आज राति हिमाली क्षेत्रमा सामान्य बदली, पहाडी क्षेत्रमा आंशिक बदली तथा तराई क्षेत्रमा अधिकांश स्थानमा मौसम सफा रहने अनुमान छ। कोशी, कर्णाली र सुदूरपश्चिम प्रदेशका हिमाली तथा पहाडी भूभागका केही स्थान तथा बागमती, गण्डकी र लुम्बिनीका हिमाली क्षेत्रमा हल्का वर्षा र हिमपात हुन सक्ने सम्भावना रहेको छ।
