काठमाडौँ: न्युजिल्यान्डका उपप्रधानमन्त्री तथा परराष्ट्रमन्त्री विन्स्टन पिटर्स औपचारिक भ्रमणका लागि नेपाल आउन लाग्नुभएको छ। उहाँ यही जेठ १४ र १५ गते नेपालको भ्रमणमा रहने परराष्ट्र मन्त्रालयले जानकारी दिएको छ।
भ्रमणका अवसरमा उपप्रधानमन्त्री पिटर्सले राष्ट्रपति रामचन्द्र पौडेल तथा प्रधानमन्त्री केपी शर्मा ओलीसँग छुट्टाछुट्टै शिष्टाचार भेटवार्ता गर्नुहुनेछ। साथै, उहाँले परराष्ट्रमन्त्री डा. आरजु राणा देउवासँग द्विपक्षीय वार्ता पनि गर्नुहुनेछ।
न्युजिल्यान्डका उपप्रधानमन्त्री तथा परराष्ट्रमन्त्रीको हैसियतमा पिटर्सको यो पहिलो नेपाल भ्रमण हो। परराष्ट्र मन्त्रालयका अनुसार यस भ्रमणले नेपाल–न्युजिल्यान्डबीचको द्विपक्षीय सम्बन्धलाई थप प्रगाढ बनाउने अपेक्षा गरिएको छ।
