काठमाडौं । मौसम पूर्वानुमान महाशाखाले अहिले देशमा पश्चिमी न्यून चापिय प्रणालीको प्रभाव रहेको जनाएको छ। आज देशका अधिकांश भू–भागमा मौसम सामान्यतया शुष्क रहने अनुमान गरिएको छ।
महाशाखाका अनुसार कोशी र बागमती प्रदेशको तराई, मधेश प्रदेश, र बाँकी पहाडी भू–भागमा आंशिक रूपमा बादल लाग्नेछ। तराईका थोरै स्थानमा तुँवालो पनि पर्ने सम्भावना छ।
आज दिउँसो तराईका केही क्षेत्रमा बिहान हुस्सु र कुहिरो रहने अपेक्षा गरिएको छ। हिमाली भू–भागमा, विशेष गरी कोशी, बागमती र गण्डकी प्रदेशहरूमा साधारण रूपमा बादल लाग्ने देखिन्छ भने बाँकी पहाडी तथा हिमाली क्षेत्रहरूमा पनि आंशिक बादल रहनेछ। बाँकी भू–भागमा मौसम मुख्य रूपमा सफा रहने महाशाखाले जनाएको छ।
महाशाखाले कोशी, बागमती, गण्डकी र कर्णाली प्रदेशका उच्च पहाडी तथा हिमाली भू–भागका एक–दुई स्थानमा हल्का वर्षा वा हिमपात हुने सम्भावना रहेको चेतावनी दिएको छ।
आज राति पनि तराईभित्रका केही स्थानमा तुँवालो रहने, साथै कोशी, बागमती र गण्डकी प्रदेशका हिमाली भू–भागमा आंशिक बादल रहने, बाँकी भू–भागमा मौसम सामान्यतया सफा रहने अनुमान गरिएको छ।
