काठमाडौँ। नेपाल रेडक्रस सोसाइटीले एकमहिने सदस्यता वितरण अभियान सुरु गरेको छ। सोसाइटीले सूचना जारी गर्दै फागुन २५ गतेदेखि सुरु भएको अभियान चैत २४ गतेसम्म सञ्चालन हुने जनाएको छ।
सोसाइटीका अनुसार सदस्यता सधैं खुला रहने व्यवस्था भए पनि विधान २०२० (अठारौँ संशोधन २०८२ सहित) अनुसार केन्द्रीय तदर्थ समितिको फागुन २४ गतेको निर्णयअनुसार विशेष अभियान सञ्चालन गरिएको हो। अभियानमार्फत सदस्यता लिन इच्छुक नेपाली नागरिकलाई सहभागी हुन आह्वान गरिएको छ। साथै, युवाको सहभागिता वृद्धि र कम्तीमा ३३ प्रतिशत महिला सहभागिता सुनिश्चित गर्ने लक्ष्य पनि राखिएको छ।
रेडक्रसका सिद्धान्त, मूल्य र मान्यतालाई आत्मसात् गर्दै तोकिएको प्रक्रिया पूरा गरी शुल्क बुझाएर सदस्यता लिन सकिनेछ। सदस्यता पालिका तहका उपशाखा, जिल्ला शाखा, प्रदेश कार्यालय तथा केन्द्रीय कार्यालयबाट प्राप्त गर्न सकिने व्यवस्था गरिएको छ।
सम्पर्कका लागि सम्बन्धित तहका पदाधिकारीहरूसँग समन्वय गर्न सकिने र थप जानकारीका लागि सोसाइटीको आधिकारिक वेबसाइट वा निःशुल्क हटलाइन सेवा ११३० प्रयोग गर्न सकिने जनाइएको छ।
