काठमाडौँ: नेपाल र चीनका सुरक्षाकर्मीले हुम्लाको उत्तरी सीमा क्षेत्रमा संयुक्त अनुगमन सम्पन्न गरेका छन्। उत्तरी नाम्खा गाउँपालिका–५ हिल्साको किट क्षेत्रमा पर्ने सीमानाकाको शनिबार अनुगमन गरिएको हो।
दुवै देशका सुरक्षाकर्मीको सहमतिमा हिल्सास्थित किट क्षेत्रमा पर्ने सिमाना र सीमास्तम्भको संयुक्त अनुगमन गरिएको सशस्त्र प्रहरी बल सीमा सुरक्षा चौकी हिल्साका प्रमुख सशस्त्र प्रहरी निरीक्षक कृष्णबहादुर ओझाले जानकारी दिनुभयो। अत्यधिक चिसोका कारण हिल्सादेखि किटसम्मको यात्रा चुनौतीपूर्ण रहेको जनाइएको छ। संयुक्त अनुगमन सीमानाकामा अवाञ्छित घटना हुन नदिन, सीमास्तम्भको अवस्थाको जानकारी लिन, र सुरक्षाकर्मीबीच समन्वय बढाउन गरिएकै उद्देश्यले गरिएको सशस्त्र प्रहरी ४४ नम्बर गुल्म सिमकोटका सशस्त्र प्रहरी नायब उपरीक्षक देवराज राईले बताउनुभयो।
हिल्साबाट नारा र लिमीतर्फ पनि नेपाली सुरक्षाकर्मीले नियमित गस्ती गर्दै आएका छन्। अनुगमन टोलीमा चीनतर्फका सुरक्षाकर्मी र नेपालतर्फका सशस्त्र प्रहरी बल तथा जनपद प्रहरीको सहभागिता थियो।
विसं २०७७ मा उत्तरी सीमा हिल्सानाकामा सशस्त्र प्रहरी बल स्थापनासँगै सीमा सुरक्षामा थप सक्रियता ल्याइएको छ। हिउँदयाममा उत्तरी नाम्खामा हिमपात हुने र यारी–हिल्सा मार्ग अवरुद्ध हुने भए पनि सीमा सुरक्षामा बाह्रै महिना सुरक्षाकर्मी खटिने गरेको नायब उपरीक्षक राईले जानकारी दिनुभयो।
