काठमाडौं । प्रधानमन्त्री सुशीला कार्की हालै सम्पन्न निर्वाचन सफल बनाउन योगदान पुर्याएका सुरक्षा निकायका पदाधिकारी, कर्मचारी तथा मतदाताप्रति धन्यवाद व्यक्त गर्न मधेस पुगेकी छन्।
मधेस प्रदेशको राजधानी जनकपुरमा आयोजित कार्यक्रममा उनले चुनौतीपूर्ण परिस्थितिका बीच पनि निर्वाचन शान्तिपूर्ण, निष्पक्ष र व्यवस्थित रूपमा सम्पन्न गर्न खटिएका सुरक्षा अधिकारी, प्रशासनिक कर्मचारी र सरोकारवाला निकायको भूमिका प्रशंसनीय रहेको बताइन्।
प्रधानमन्त्री कार्कीले प्रदेश–प्रदेशका सुरक्षा निकाय प्रमुख तथा निर्वाचन व्यवस्थापनमा संलग्न अधिकारीहरूलाई बधाई दिँदै उनीहरूको समर्पण र जिम्मेवारीप्रति कृतज्ञता व्यक्त गरिन्।
उनले भनिन्, “हामीले बनाएको योजना तपाईँहरूले उत्कृष्ट रूपमा कार्यान्वयन गर्नुभयो। हामीले लिएको सङ्कल्प सफलतापूर्वक पूरा गर्नुभएकोमा म आभारी छु। मलाई दिइने बधाईको वास्तविक हकदार तपाईँहरू नै हुनुहुन्छ।”
कार्यक्रममा सहभागी सुरक्षा अधिकारीहरूले पनि यस्तो महत्वपूर्ण राष्ट्रिय जिम्मेवारीमा सहभागी हुन पाएकोमा खुसी व्यक्त गर्दै प्रधानमन्त्रीको नेतृत्वमा काम गर्न पाउनु गर्वको विषय भएको बताए। उनीहरूले निर्वाचनका क्रममा भोगेका अनुभवसमेत साझा गरेका थिए।
