काठमाडौं । जेनजी आन्दोलनपछि उत्पन्न राजनीतिक संकटका बीच मुलुकलाई निकास दिन सफल भएकी प्रधानमन्त्री सुशीला कार्कीले ६ महिनाभित्र प्रतिनिधिसभा निर्वाचन सम्पन्न गराएर प्रशंसा बटुलेकी छन्। बिना हिंसा र रक्तपात निर्वाचन गराउने लक्ष्य पूरा गरेपछि उनको नेतृत्वको व्यापक सराहना भएको छ।
मुलुक अन्योलमा रहेका बेला पहिलो महिला प्रधानमन्त्रीका रूपमा जिम्मेवारी सम्हालेकी कार्कीले निर्वाचनमार्फत राजनीतिक निकास दिएर इतिहास रचेको टिप्पणी गरिएको छ। तर, सरकारको कार्यकालको अन्त्यतिर उनले गरेको एउटा नियुक्ति निर्णयले भने विवाद सिर्जना गरेको छ।
प्रधानमन्त्री कार्कीले मन्त्रिपरिषद्को अन्तिम बैठकबाट आफ्ना प्रमुख स्वकीय सचिव आदर्शकुमार श्रेष्ठलाई राष्ट्रिय प्रकृति संरक्षण कोषको अध्यक्षमा नियुक्त गरेपछि आलोचना भएको हो। सामान्यतया वनविज्ञ वा सम्बन्धित क्षेत्रका विद्वान्ले नेतृत्व गर्ने संस्थामा आफ्ना स्वकीय सचिवलाई नियुक्त गरिएको भन्दै निर्णयप्रति प्रश्न उठाइएको छ।
कुशासन, नातावाद र भ्रष्टाचारको विरोधमा भएको जेनजी आन्दोलनको पृष्ठभूमिमा बनेको सरकारले यस्तो नियुक्ति गर्नु अनुचित भएको भन्दै सुशासन पक्षधरहरूले आलोचना गरेका छन्। यसअघि पनि प्रधानमन्त्री कार्कीले श्रेष्ठकी श्रीमती र आफन्तलाई सचिवालयमा नियुक्त गरेपछि विवाद भएको थियो। पछि उनले ती नियुक्ति खारेज गरेकी थिइन्।
कार्कीबाहेक हालसम्म कुनै पनि पूर्वप्रधानमन्त्रीले आफ्ना स्वकीय सचिवलाई राजकीय लाभको पदमा नियुक्त नगरेको भन्दै कतिपयले यसलाई अधिकारको दुरुपयोगको रूपमा टिप्पणी गरेका छन्।
प्रधानमन्त्री कार्की र आदर्शकुमार श्रेष्ठबीचको सम्बन्ध पुरानो रहेको बताइन्छ। कार्की प्रधानन्यायाधीश हुँदा श्रेष्ठ निजी सहायकका रूपमा कार्यरत थिए। अवकाशपछि पनि उनले कार्कीलाई सहयोग गर्दै आएका थिए।
राष्ट्रिय प्रकृति संरक्षण कोषको संरक्षक प्रधानमन्त्री रहने व्यवस्था छ र अध्यक्ष नियुक्त गर्ने अधिकार पनि प्रधानमन्त्रीलाई नै हुन्छ। सोही अधिकार प्रयोग गर्दै बालुवाटार छोड्नुअघि कार्कीले श्रेष्ठलाई उक्त पदमा नियुक्त गरेकी हुन्।
यसबीच आइतबार राष्ट्रिय समाचार समिति (रासस)लाई दिएको अन्तर्वार्तामा प्रधानमन्त्री कार्कीले स्वकीय सचिव श्रेष्ठको खुलेर प्रशंसा गरेकी थिइन्। उनले आफूलाई सफल बनाउन प्रेस सल्लाहकार रामबहादुर रावल र प्रमुख स्वकीय सचिव आदर्शकुमार श्रेष्ठले महत्वपूर्ण योगदान दिएको बताएकी छन्।
कार्कीका अनुसार अदालतमा लामो समय काम गरेका श्रेष्ठलाई कानुन र प्रविधि दुवै विषयमा राम्रो ज्ञान छ। उनले धेरै प्रधानन्यायाधीशको सचिवालयमा निजी सहायकका रूपमा काम गर्दै विश्वास जितेको अनुभव रहेको पनि प्रधानमन्त्री कार्कीले उल्लेख गरेकी छन्।
