काठमाडौं । निर्वाचन आयोग ले देशभरका निर्वाचन क्षेत्रमा मतपत्रसहित अन्य निर्वाचन सामग्री ढुवानी गर्ने कामलाई तीव्र बनाएको जनाएको छ। हालसम्म सुदूरपश्चिम, कर्णाली र कोशी प्रदेशमा मतपत्र पठाइसकिएको आयोगले जानकारी दिएको छ।
अन्य प्रदेशहरूमा पनि नियमित रूपमा मतपत्र तथा आवश्यक सामग्री ढुवानी भइरहेको छ। प्रतिनिधिसभा सदस्य निर्वाचनका लागि पहिलो हुने निर्वाचित हुने (एफपीटीपी) र समानुपातिक निर्वाचन प्रणालीतर्फका मतपत्र छपाइ कार्य यसअघि नै सम्पन्न भइसकेको छ।
पहिलो हुने निर्वाचित हुने प्रणालीअन्तर्गत ७७ जिल्लाका १६५ निर्वाचन क्षेत्रका लागि दुई करोड तीन लाख २३ हजार मतपत्र छपाइ तथा प्याकिङ गरी सम्बन्धित निर्वाचन क्षेत्रमा पठाइएको आयोगले जनाएको छ।
आयोगले गत माघ २९ गतेदेखि कर्णाली प्रदेशबाट मतपत्र ढुवानी सुरु गरेको थियो। त्यसपछि सुदूरपश्चिम, कर्णाली र कोशी प्रदेशमा नियमित रूपमा सामग्री पठाइएको हो। वाग्मतीलगायत अन्य प्रदेशमा पनि ढुवानी कार्य जारी रहेको छ। राजधानी काठमाडौंभित्रका मतदान केन्द्रमा समेत केही दिनभित्र मतपत्र पुर्याइने आयोगले जनाएको छ।
मतपत्र बाहेकका अन्य निर्वाचन सामग्रीको ढुवानी भने सम्पन्न भइसकेको छ। निर्वाचनका लागि ५१ प्रकारका सामग्री आवश्यक पर्ने जनाइएको छ।
मतपत्र छपाइ कार्य तोकिएको क्यालेण्डरअनुसार जनक शिक्षा सामग्री केन्द्र लिमिटेड, सानोठिमीमा गत पुस २२ गतेबाट मतदाता शिक्षा प्रयोजनका लागि सुरु गरिएको थियो। आयोगले १० लाख ९८ हजार २०० नमूना मतपत्र छपाइ गरेको थियो।
त्यसैगरी, समानुपातिक निर्वाचन प्रणालीतर्फको मतपत्र छपाइ पुस २६ गतेदेखि सुरु भई माघ १३ गतेसम्म सम्पन्न गरिएको थियो। समानुपातिकतर्फ दुई करोड आठ लाख ३० हजार मतपत्र छपाइ गरिएको आयोगले जनाएको छ।
