मनाङ: मनाङको चामे गाउँपालिका–१ तिमाङ जङ्गलमा शुक्रबार बेलुकीदेखि लागेको आगो सोमबारसम्म पनि नियन्त्रणमा आउन सकेको छैन। जिल्ला प्रशासन कार्यालयका अनुसार आगो निभाउने प्रयास जारी छ।
प्रमुख जिल्ला अधिकारी मातृका आचार्यका अनुसार आगो नियन्त्रणका लागि तीनवटै सुरक्षा निकाय परिचालन गरिएको छ। “स्थानीयको सहयोगमा सुरक्षाकर्मीहरू आगो निभाउन प्रयासरत छन्। आगलागी जटिल भिर क्षेत्रमा भएकाले नियन्त्रणमा समस्या भइरहेको छ,” उहाँले बताउनुभयो।
अन्नपूर्ण संरक्षण क्षेत्र आयोजना इलाका मनाङका प्रमुख ढकबहादुर भुजेलका अनुसार सुक्खायामका कारण आगो नियन्त्रण गर्न कठिनाइ भइरहेको छ। “सालका काठ र सुकेको वनस्पतिले आगो तीव्र हुने डर छ। हावाहुरीले झन् आगो बढ्न सक्छ,” भुजेलले भन्नुभयो।
भुजेलका अनुसार आगलागीबाट वनआलु, लौडसल्ला, जटामसी, पाँचऔँले र गुची च्याउलगायत जडीबुटी नष्ट हुने खतरा छ। “चराचुरुङ्गी, वन्यजन्तुको बासस्थान र याकचौँरीका चरन क्षेत्र प्रभावित हुने सम्भावना छ,” उहाँले बताउनुभयो।
यस वर्षको मङ्सिरयता ताल, आइसलेक र पिसाङ भिरमा आगलागी भएका घटनाहरू भइरहेको जानकारी पनि भुजेलले दिनुभयो। विसं २०७७ मा लागेको आगो दुई महिनापछि मात्रै नियन्त्रणमा आएको थियो, जसले १,२०० हेक्टर वन क्षेत्र नष्ट गरेको थियो।
जिल्ला प्रशासनले आगो अन्यत्र नफैलियोस् भन्न सुरक्षित उपायहरू अपनाइसकेको र बस्तीमा तत्काल कुनै ठूलो जोखिम नरहेको जनाएको छ।
