काठमाडौं । प्रधानमन्त्री बालेन्द्र (बालेन) शाहले अत्यन्त जरुरी आयोजनाहरूलाई प्राथमिकताका आधारमा अघि बढाउने प्रतिबद्धता जनाएका छन्।
मंगलबार सिंहदरबारमा सुदूरपश्चिम प्रदेशबाट प्रतिनिधित्व गर्ने सांसदहरूसँग छलफल गर्दै उनले बजेटको सीमाभित्र रहेर अत्यावश्यक योजनाहरूलाई प्राथमिकतामा राखिने बताएका हुन्।
छलफलका क्रममा प्रधानमन्त्री शाहले प्रदेशमा अघि बढ्न नसकेका महत्वपूर्ण योजनाहरूको अवस्थाबारे जानकारी लिएका थिए। कैलाली–४ बाट निर्वाचित सांसद खेमराज कोइरालाका अनुसार सुदूरपश्चिमका लागि करिब २ अर्ब ६० करोड रुपैयाँ बजेट आवश्यक रहेको माग गरिएको थियो, जसमा प्रधानमन्त्रीबाट सकारात्मक प्रतिक्रिया प्राप्त भएको छ।
सांसद कोइरालाले बजेटको आकारअनुसार आवश्यक योजनाहरूलाई अघि बढाउने प्रतिबद्धता आएको पनि जानकारी दिए।
यसअघि प्रधानमन्त्री शाहले सोमबार कोशी र कर्णाली प्रदेशबाट निर्वाचित विभिन्न दलका सांसदहरूसँग पनि यस्तै छलफल गरेका थिए।
