काठमाडौं । बारा–१ बाट निर्वाचित राष्ट्रिय स्वतन्त्र पार्टीका सांसद गणेश धिमालले जनताको सचेतताले नै देशमा हरेक परिवर्तन सम्भव हुने बताएका छन्।
सोमबार काठमाडौंमा आयोजित एक कार्यक्रममा बोल्दै उनले केही राजनीतिक विश्लेषकहरूले वर्तमान व्यवस्थामा कुनै पनि दलले स्पष्ट बहुमत ल्याउन नसक्ने तर्क गर्दै आएको स्मरण गर्दै जनताले त्यसलाई गलत सावित गरिदिएको बताए।
उनले भने, “विभिन्न कालखण्डमा केही विश्लेषकहरूले यो व्यवस्थामा कुनै पनि दलले स्पष्ट बहुमत ल्याउन सक्दैन भन्ने कुरा विभिन्न फोरममा राख्दै आएका थिए। तर आज जनताले ती भनाइहरूलाई गलत सावित गरिदिएका छन्। जनता नै जनार्दन हुन् र हरेक परिवर्तनको नेतृत्व जनताले नै गरेका छन्।”
धिमालले अब बन्ने सरकारले जनताको अपेक्षाअनुसार काम गर्ने विश्वास व्यक्त गरे। उनका अनुसार प्रशासनिक तथा प्रक्रियागत काम पूरा भएपछि चाँडै नै बालेन शाहको नेतृत्वमा सरकार गठन हुने र त्यो जनताको सरकार हुने बताए।
उनले चैतको पहिलो हप्तासम्म आवश्यक प्रशासनिक प्रक्रिया पूरा भएसँगै नयाँ सरकार गठन हुने उल्लेख गर्दै केही समय सरकारलाई काम गर्न दिन आग्रह गरे। साथै उनले आलोचनाभन्दा सहजीकरण र रचनात्मक सुझाव दिन आग्रह गरेका छन्।
धिमालले नयाँ सरकार गठनसँगै ग्यासको मूल्यवृद्धि वा अभाव हुने भन्ने विषयमा मिडियामा आएका समाचारहरू अतिरञ्जित भएको दाबी गरे। उनले इमान्दारितापूर्वक काम गर्न अवसर दिन आग्रह गर्दै देश निर्माणका लागि आफूहरू प्रतिबद्ध रहेको बताए।
उनले छोटो र प्रभावकारी मन्त्रिपरिषद् गठन गरिने तथा आवश्यकताअनुसार नीतिगत सुधार र संशोधन गरिने पनि जानकारी दिए।
