काठमाडौँ । नेपाली कम्युनिस्ट पार्टीका संयोजक पुष्पकमल दाहाल ‘प्रचण्ड’ले चितवन–३ मा रेनु दाहाललाई जिताउन आफूले कुनै पहल नगरेको बताएका छन्।
बिहीबार केन्द्रीय कार्यालय पेरिसडाँडामा आयोजित पत्रकार सम्मेलनमा उनले रेनुलाई जिताउन सक्रिय रूपमा लागेको भन्ने हल्ला अस्वीकार गरे। “चितवन–३ मा रेनु दाहाललाई जिताउन लागेको कुरा बिल्कुल सही होइन। त्यस्तो आरोप म खारेज गर्न चाहन्छु। मैले कुनै पनि वक्तव्य जारी गरेको छैन। तालमेलका लागि कुनै पहल गरेको पनि छैन,” उनले भने।
यद्यपि, रेनुले विगत नौ वर्षदेखि गरेको मेहनतका आधारमा चुनाव जित्नुपर्ने आफ्नो धारणा रहेको उनले उल्लेख गरे। “यदि त्यसो भएन भने ममाथि र रेनुमाथि नै अन्याय हुन्छ जस्तो लाग्छ,” प्रचण्डले भने।
