काठमाडौं । सर्वोच्च अदालत ले अदालतहरूमा लागू गरिएको गोला प्रक्रियामार्फत हुने पेशी व्यवस्थापन प्रणालीमा कुनै परिवर्तन वा पुनर्विचार गर्ने योजना नरहेको स्पष्ट पारेको छ।
केही सञ्चार माध्यम र सामाजिक सञ्जालमा गोला प्रक्रियाको विकल्प खोजिएको तथा हालको प्रणाली हटाउन लागिएको भन्ने समाचार सार्वजनिक भएपछि सर्वोच्च अदालतले विज्ञप्ति जारी गर्दै त्यसप्रति गम्भीर ध्यानाकर्षण भएको जनाएको हो।
सर्वोच्च अदालतका प्रवक्ता अर्जुनप्रसाद कोइराला द्वारा जारी प्रष्टीकरणमा दैनिक पेशी व्यवस्थापनका लागि प्रयोग भइरहेको गोला प्रक्रियाबारे पुनर्विचार गर्ने कुनै औपचारिक सोच, धारणा वा योजना नरहेको उल्लेख गरिएको छ।
विज्ञप्तिअनुसार अदालतहरूमा ‘गोला प्रक्रियाद्वारा पेशी व्यवस्थापन सम्बन्धी कार्यविधि निर्देशिका, २०७८’ अनुसार नै मुद्दाको पेशी व्यवस्थापन भइरहेको छ र यही प्रणालीलाई निरन्तरता दिइने सर्वोच्च अदालतले स्पष्ट गरेको छ।
