काठमाडौँ । गृहमन्त्री सुधन गुरूङले पदभार ग्रहण गरेका छन्। शीतलनिवासमा शपथ ग्रहण गरेपछि उनी सिंहदरबारस्थित गृह मन्त्रालय पुगेर औपचारिक रूपमा जिम्मेवारी सम्हालेका हुन्।
पदभार ग्रहणका क्रममा मन्त्री गुरूङले ‘जेनजी’ को भावना अनुसार काम गर्ने प्रतिबद्धता व्यक्त गरेका छन्। उनले गृहमन्त्रालय अन्तर्गतका सबै निकायबाट प्रदान हुने सेवाहरूलाई एकद्वार प्रणालीमार्फत प्रवाह गर्न निर्देशन दिएका छन्।
सुशासनलाई प्राथमिकतामा राख्दै उनले भ्रष्टाचारविरुद्ध शून्य सहनशीलता कायम गर्ने र भिआइपीहरूको यात्राका कारण सर्वसाधारणलाई दुःख नपर्ने अवस्था सुनिश्चित गर्ने बताएका छन्।
‘जेनजी आन्दोलनको जनादेश अनुसार त्यसलाई कार्यान्वयन गर्ने प्रतिबद्धतासहित अगाडि बढ्छौं। परिवर्तनको सुरुवात गृहमन्त्रालय अन्तर्गतका निकायबाट हुनेछ। सेवा प्रवाहको विषयमा जनताका गुनासाहरू सिधै सरकारले सुन्ने गरी प्रणाली विकास गर्छौं,’ पदभार ग्रहणका क्रममा उनले बताएका छन्।
