काठमाडौं: नेपाल राष्ट्र बैंकको गभर्नर नियुक्तिमा उमेर सीमा हटाउँदै गरिएको मापदण्ड संशोधन तत्काल कार्यान्वयन नगर्न सर्वोच्च अदालतले अन्तरिम आदेश जारी गरेको छ।
न्यायाधीश नित्यानन्द पाण्डेयको एकल इजलासले संशोधित मापदण्ड तत्कालका लागि कार्यान्वयन रोक्न आदेश दिएको हो। अदालतले यस विषयमा विस्तृत छलफल गर्न दुवै पक्षलाई आगामी साता उपस्थित हुन पनि बोलाएको छ।
सरकारले हालै ‘अर्थ मन्त्रालयसम्बद्ध सार्वजनिक निकायका पदाधिकारी तथा सदस्यको नियुक्ति तथा मनोनयन सम्बन्धी मापदण्ड, २०७३’ संशोधन गर्दै गभर्नर लगायतका पदाधिकारी नियुक्तिमा रहेको उमेर सीमा हटाएको थियो। सो संशोधनविरुद्ध सर्वोच्चमा रिट दायर भएको थियो।
