काठमाडौं । नेकपा एमालेका अध्यक्ष केपी शर्मा ओलीलाई त्रिवि शिक्षण अस्पतालमै राखेर उपचार भइरहेको छ।
शनिबार बिहान पक्राउ परेपछि प्रारम्भिक स्वास्थ्य परीक्षणका लागि टिचिङ आकस्मिक कक्षमा परीक्षण गर्दा उनको मुटुको चाल बढेको देखिएको थियो। चिकित्सकको सल्लाह अनुसार ओलीलाई भर्ना गरिएको हो।
ओली हाल एनेक्स वानको ५०१ बेडमा उपचाररत छन्। उनको मिर्गौला र मुटु रोग विशेषज्ञ टोलीले निगरानीमा राखेर उपचार गरिरहेका छन्।
पूर्वप्रधानमन्त्री ओली दुई पटक मिर्गौला प्रत्यारोपण गराइसकेका छन् र नियमित रूपमा प्रत्यारोपणपछिको औषधि (इम्युनोसप्रेसिभ) सेवन गरिरहेका छन्।
जेनजी आन्दोलन दमन गरेको आरोपमा फौजदारी कसुरमा कारबाही सिफारिस भएपछि प्रहरीले आज बिहान ओलीलाई गुण्डुस्थित निवासबाट पक्राउ गरेको थियो। तत्कालीन गृहमन्त्री रमेश लेखक पनि आजै पक्राउ परेका छन्।
