काठमाडौं । अर्थमन्त्री डा. स्वर्णिम वाग्लेले औषधीय प्रयोजनका लागि गाँजा उत्पादन तथा बजारीकरण गर्न आवश्यक कानुनी व्यवस्था भए अर्थ मन्त्रालयले सहजीकरण गर्ने बताएका छन्।
राष्ट्रियसभाको आजको बैठकमा सांसद विष्णुकुमारी सापकोटाको प्रश्नको जवाफ दिँदै अर्थमन्त्री वाग्लेले गाँजा उत्पादन तथा बजारीकरणलाई आय, रोजगारी र सम्भावित राजस्व सङ्कलनको विषयमा मात्र सीमित गरेर हेर्न नहुने बताए।
उनका अनुसार गाँजा औषधिजन्य तथा लागुपदार्थका रूपमा नियन्त्रित विषय भएकाले यसबारे सम्बन्धित विज्ञबाट अध्ययन गरी आवश्यक कानुनी व्यवस्था गर्नुपर्ने हुन्छ।
‘गाँजा उत्पादन तथा बजारीकरणको विषय आय, रोजगारी तथा सम्भावित राजस्व सङ्कलनमा मात्र सीमित नभई औषधिजन्य तथा लागुपदार्थका रूपमा नियन्त्रित विषय हो। सम्बन्धित विज्ञबाट अध्ययन तथा निष्कर्ष भई कानुनबमोजिम व्यवस्थित गरिएमा अर्थ मन्त्रालय सहजीकरणका लागि तत्पर रहनेछ,’ वाग्लेले भने।
विकसित तथा पश्चिमा मुलुकहरूमा समेत गाँजासम्बन्धी नीतिमा खुलापन बढिरहेको उल्लेख गर्दै उनले नेपालले पनि यस विषयलाई सकारात्मक दृष्टिले अध्ययन गर्नुपर्ने बताए। उनले गृह मन्त्रालयसँग समन्वय गरी थप अध्ययन तथा निरीक्षण अघि बढाउने जानकारी दिए।
‘थप अध्ययन र निक्र्योल गरेर कानुनमै यसको व्यवस्था गर्न सकेमा अर्थ मन्त्रालयले सकारात्मक रूपमा हेर्नेछ। गृह मन्त्रालयसँग थप समन्वय गरेर तदारुकताका साथ यो विषयको निक्र्योल गर्न पहल गर्नेछु,’ उनले भने।
कानुनबमोजिम गाँजा उत्पादन तथा बजारीकरणलाई व्यवस्थित गर्न सकिएमा आय तथा रोजगारी सिर्जना, औद्योगिक प्रवर्द्धन र सरकारी राजस्व वृद्धिमा योगदान पुग्न सक्ने अर्थमन्त्री वाग्लेको भनाइ छ।
यसैबीच, भूमि व्यवस्था, सहकारी तथा गरिबी निवारण र सङ्घीय मामिला तथा सामान्य प्रशासन मन्त्रालयअन्तर्गत आर्थिक वर्ष २०८३/८४ मा मन्त्रालय, आयोग, विभाग, कार्यालय तथा समितिसँग सम्बन्धित ऐन, नियम, कार्यविधि, निर्देशिका तथा मापदण्ड तर्जुमाका लागि प्रारम्भिक रूपमा ७ लाख रुपैयाँ विनियोजन गरिएको उनले जानकारी दिए।
सांसद भुवनबहादुर सुनारको प्रश्नको जवाफ दिँदै वाग्लेले आवश्यकताअनुसार उक्त रकम वृद्धि गर्न सम्बन्धित मन्त्रालयले रकमान्तर गर्न सक्ने बताए। औचित्यका आधारमा थप बजेट आवश्यक परे अर्थ मन्त्रालयसँग माग भएमा आवश्यक रकम उपलब्ध गराउने आश्वासनसमेत उनले दिए।
