काठमाडौं: नेकपा एमाले संसदीय दलका प्रमुख सचेतक महेश बर्तौलाले संसदको अवरोध अन्त्यमा प्रतिपक्षी दलले जिम्मेवार भूमिका निर्वाह गर्न नसकेको आरोप लगाएका छन्।
संसद भवन नयाँ बानेश्वरमा बिहीबार सञ्चारकर्मीसँग कुरा गर्दै बर्तौलाले सत्तापक्षको तर्फबाट गृहमन्त्रीलाई सम्बोधनको अवसर दिने तयारी भइसकेको तर प्रतिपक्षको असहयोगका कारण संसद अवरुद्ध हुन पुगेको बताएका हुन्। उनले शुक्रबार दिउँसो १ बजे बोलाइएको प्रतिनिधिसभा बैठक सहज रूपमा सञ्चालन हुने अपेक्षा व्यक्त गर्दै प्रतिपक्षी दलले सहयोग गर्ने विश्वास पनि व्यक्त गरे।
बजेटमाथि संसदमा छलफल हुन नदिने कुरा अस्वाभाविक रहेको उल्लेख गर्दै उनले यस्तो दृष्टिकोण परिपक्व लोकतन्त्रको मान्यताविपरीत भएको बताए।
पतञ्जली जग्गा प्रकरणमा एमाले अध्यक्ष केपी शर्मा ओलीको निर्देशनमा आफूविरुद्ध भ्रष्टाचार मुद्दा दर्ता भएको भनी माधवकुमार नेपालले दिएको अभिव्यक्तिप्रति बर्तौलाले आपत्ति जनाएका छन्। उनले सो टिप्पणीलाई प्रतिशोधपूर्ण र तथ्यहीन भनेका छन्।
त्यस्तै, उनले संवैधानिक आयोगहरूको काममा प्रधानमन्त्रीलाई जोडेर टिप्पणी गर्नु उपयुक्त नहुने धारणा राखे।
