टोकियो । अमेरिकी राष्ट्रपति डोनाल्ड ट्रम्पले मध्यपूर्वमा युद्ध अन्त्य गर्ने इरानका सर्तहरू अस्वीकार गरेपछि सोमबार एसियाली बजारमा इन्धनको मूल्य वृद्धि भएको छ।
ट्रम्पले आफ्नो पछिल्लो शान्ति प्रस्तावप्रति इरानको प्रतिक्रियालाई अस्वीकार गरेसँगै स्ट्रेट अफ हर्मुज क्षेत्रमा थप तनाव र सम्भावित अवरोधको जोखिम बढेको छ। यसले विश्वव्यापी तेल आपूर्तिमा असर पार्ने चिन्ता बढाएको छ।
यसैबीच, राष्ट्रपति ट्रम्पले चीन भ्रमणका क्रममा इरान युद्ध अन्त्यका प्रयासलाई पनि प्राथमिकतामा राख्न सक्ने संकेत दिएका छन्।
उनले भने, “मैले इरानका प्रतिनिधिहरूको प्रतिक्रिया पढेँ, मलाई त्यो स्वीकार्य लागेन।”
इरानका राष्ट्रपति मसुद पेजेस्कियनले सामाजिक सञ्जाल एक्समा प्रतिक्रिया दिँदै आफ्नो देश कहिल्यै झुक्ने नहुने स्पष्ट पारेका छन्। उनले वार्ता भए पनि त्यसलाई आत्मसमर्पणका रूपमा लिन नहुने बताएका छन्।
विश्लेषकहरूले दुवै पक्षको अडानका कारण तनाव कम हुनुको सट्टा दीर्घकालीन अनिश्चितता बढ्ने चेतावनी दिएका छन्। जापानको एमयुएफजी बैंकका विश्लेषकले स्ट्रेट अफ हर्मुजमा अवरोध बढ्ने सम्भावनाले तेल बजार थप अस्थिर बन्न सक्ने बताएका छन्।
अमेरिकी भनाइ सार्वजनिक भएपछि एसियाली सेयर बजारमा मिश्रित प्रभाव देखिएको छ। निक्केई सूचकांक ०.४ प्रतिशत र ह्याङसेङ ०.३४ प्रतिशतले घटेको छ भने कोरियाको कोस्पी सूचकांक ४ प्रतिशतले बढेको छ।
जापानमा प्रमुख गेमिङ कम्पनीको कमजोर नाफा पूर्वानुमानपछि निन्टेन्डोको सेयर करिब १० प्रतिशतले घटेको छ।
यसैबीच, अमेरिकी अर्थमन्त्री स्कट बेसेन्ट चीन भ्रमण अघि जापान र दक्षिण कोरिया जाने कार्यक्रम तय भएको छ। उनले आर्थिक सुरक्षा नै राष्ट्रिय सुरक्षा भएको बताएका छन्।
टोकियोमा उनले जापानी प्रधानमन्त्रीसँग भेट गर्ने तयारी छ भने सोलमा चिनियाँ उपप्रधानमन्त्रीसँग छलफल हुने बताइएको छ। अमेरिकी र चीनबीचको व्यापार सम्बन्ध सुधार र तनाव व्यवस्थापनका विषयमा समेत छलफल हुने अपेक्षा गरिएको छ।
