पोखरा: राष्ट्रिय स्वतन्त्र पार्टी (रास्वपा) का सभापति तथा निलम्बित सांसद रवि लामिछानेविरुद्ध सहकारी प्रकरणमा दायर मुद्दाको बयान आज पनि जारी रहने भएको छ।
कास्की जिल्ला अदालतमा बिहीबारदेखि सुरु भएको बयान न्यायाधीश नीतिज राईको इजलासमा दुई घन्टा लामो चलेको थियो। अदालतका सूचना अधिकारी सुरज अधिकारीका अनुसार लामिछानेको बाँकी बयान आज दिइनेछ।
यसअघि, सोमबार र मंगलबार अदालतमा उपस्थित गराइए पनि पालो नआएकाले लामिछानेको बयान हुन सकेको थिएन। मंगलबार गोर्खा मिडियाका पूर्वउपाध्यक्ष तथा पूर्वडीआईजी छविलाल जोशीसँगको बयान सकिएपछि अर्का प्रतिवादी लिला पछाईसँग बयान सुरु भएको थियो। लामिछानेलाई त्यसपछिको दिनमा हिरासत फर्काउनुपरेको थियो।
छविलाल जोशीको सहकारी ठगी, सम्पत्ति शुद्धीकरण, र संगठित अपराधसम्बन्धी बयान पूरा भइसकेको छ। बयानपछि अब लामिछानेको पालो आउने अनुमान गरिएको छ। सुनुवाइ सम्पन्न भएपछि अदालतले लामिछानेलाई धरौटीमा छाड्ने, साधारण तारेखमा राख्ने वा पुर्पक्षका लागि पठाउने निर्णय गर्नेछ।
सरकारी वकिलको कार्यालय, कास्कीले रवि लामिछानेसहित ४४ जनालाई सहकारी ठगीमा प्रतिवादी बनाउँदै मुद्दा दर्ता गरेको छ। थप पाँच जनालाई बिगोअनुसार सम्पत्ति जफत गर्न मात्र प्रतिवादीका रूपमा दर्ता गरिएको छ। लामिछानेविरुद्ध संगठित अपराध, सहकारी ठगी, र सम्पत्ति शुद्धीकरण गरी तीन वटा कसुरमा अभियोग पत्र दर्ता गरिएको छ।
प्रहरी अनुसन्धानले रवि लामिछाने, जीबी राईसहितको समूहले सूर्यदर्शन सहकारीबाट १ अर्ब ५१ करोड रुपैयाँ अपचलन गरेको निष्कर्ष निकालेको छ। सहकारीको ५ करोड ४८ लाख रुपैयाँ गोरखा मिडिया नेटवर्कमा लगेर दुरुपयोग गरिएको प्रहरीको दाबी छ। यसै अभियोगमा सभापति लामिछाने कात्तिक २ गते काठमाडौँबाट पक्राउ परेका थिए।
गत शुक्रबार मात्रै सोही प्रकरणमा गोर्खा मिडियाका अध्यक्ष जीबी राईसहित १९ जनाविरुद्ध पूरक अभियोगपत्र दर्ता गरिएको थियो। प्रहरीको रायअनुसार ६५ जनालाई प्रतिवादी बनाइनुपर्ने सुझाव दिइएको भए पनि सरकारी वकिलले ४९ जनामाथि मात्रै मुद्दा दर्ता गरेको छ।
