काठमाडौँ: नेपाल विद्युत प्राधिकरणले मर्मत सम्भार तथा पूर्वनिर्धारित कार्यहरूका लागि आज काठमाडौँका विभिन्न स्थानमा विद्युत आपूर्ति केही समयका लागि बन्द रहने जनाएको छ।
प्राधिकरणद्वारा जारी गरिएको सार्वजनिक सूचनाका अनुसार बलम्बु वितरण केन्द्रअन्तर्गत मातातीर्थ फिडरमा बिहान ११ बजेदेखि अपराह्न ४ बजेसम्म विद्युत आपूर्ति बन्द हुनेछ। ‘कन्डक्टर अपग्रेडिङ’का लागि उक्त ‘फिडर सटडाउन’ गरिने जनाइएको छ। यसैगरी, सोही वितरण केन्द्रको सतुङ्गल फिडरअन्तर्गत पर्ने कञ्चन गेट, बोसीगाउँ, बौथली, सतुङ्गल चोक आसपासका क्षेत्रमा पनि सोही समयमा विद्युत आपूर्ति प्रभावित हुने छ।
जोरपाटी वितरण केन्द्रअन्तर्गत डाँछी फिडरका माकलबारी, दक्षिणढोका, तिवारी टोल, शिवचोक, अर्याल गाउँ, ग्रीनहिल सिटी, भद्रबास, नाँ गाउँ, हरियाली नगर, गजरकोट क्षेत्रका उपभोक्ताहरू बिहान १० बजेदेखि अपराह्न १ बजेसम्म विद्युत कटौतीको असर महसुस गर्नेछन्। उक्त क्षेत्रमा तार विस्तारका लागि लाइन बन्द गरिने प्राधिकरणले जनाएको छ।
त्यस्तै, मुलपानी फिडरअन्तर्गत मुलपानीचौर, थली, थापाचोक, लक्ष्मीनारायण चोक, चापाबोट, देवलधारा, मनकामना मन्दिर, मुलपानी खहरे, डुमाखाल, डाँछी, भद्रबास, गजरकोट क्षेत्रका लागि पनि बिहान १० बजेदेखि अपराह्न १ बजेसम्म विद्युत सेवा अवरुद्ध हुनेछ।
साँखु फिडरअन्तर्गत नयाँ पाटी, ब्रम्हखेल, इन्द्रायणी, साँखु, जर्सिङपौवा, नाङ्लेभारे, गागल, गागलफेदी, मुलपानी पिपलबोटलगायतका स्थानहरूमा पनि विद्युत आपूर्ति केही समयका लागि बन्द रहने जानकारी दिइएको छ।
प्राधिकरणले निर्धारित समय अगावै कार्य सम्पन्न भएमा विद्युत सेवा पुनः सञ्चालनमा आउने जनाउँदै उपभोक्ताहरूलाई पर्न जाने असुविधाप्रति क्षमायाचनासमेत गरेको छ।
