बुटवल: अर्घाखाँचीमा आइतबार बिहान भएको जिप दुर्घटनामा दुई जनाको ज्यान गएको छ भने दुई जना घाइते भएका छन्।
मालारानी गाउँपालिका–३ स्थित लुटीपोखरी–खनदह भित्री सडकखण्डमा लु २ च २९९० नम्बरको सिङ्गल क्याब जिप अनियन्त्रित भई दुर्घटना भएको जिल्ला प्रहरी कार्यालय अर्घाखाँचीले जनाएको छ।
दुर्घटनामा परेर चालक दिलीप खनाल र बालकृष्ण रिजालको मृत्यु भएको प्रहरी निरीक्षक जगन्नाथ मरासिनीले पुष्टि गरे।
दुर्घटनामा मालारानी गाउँपालिका–४ का वसन्त पोखरेल र भुवन पोखरेल घाइते भएका छन्। उनीहरूको उपचारका लागि नजिकैको स्वास्थ्य संस्थामा लगिएको जनाइएको छ।
दुर्घटनाको कारणबारे थप अनुसन्धान भइरहेको प्रहरीले जनाएको छ।
