बलिउड अभिनेता अभिषेक बच्चन हाल आफ्नो नयाँ फिल्म ‘आई वान्ट टु टक’ को प्रमोसनमा व्यस्त छन्। यसै सन्दर्भमा उनी आफ्ना सुपरस्टार पिता अमिताभ बच्चनको चर्चित क्विज शो ‘कौन बनेगा करोडपति’ (केबीसी) को १६औं संस्करणमा विशेष अतिथिका रूपमा सहभागी भए। बुबा–छोराको यो जोडीलाई एकसाथ पर्दामा देख्न फ्यानहरू उत्साहित छन्, जसले गर्दा कार्यक्रमको यो एपिसोड र अभिषेकका रमाइला हरकतहरू सामाजिक सञ्जालमा भाइरल भएका छन्।
प्रोमोमा देखाइएको एक रमाइलो क्षणमा, अभिषेकले आफ्नो पिताको शैलीमा ‘७ करोड’ भनेर कराउँछन्, जसरी अमिताभले प्रतियोगीहरूलाई ठूलो रकम जित्दा खुशी व्यक्त गर्छन्। मजाक गर्दै उनले भने, “हाम्रो घरमा डिनर टेबलमा पनि जब कोही प्रश्न सोध्छ, बच्चाहरू तपाईंको शैलीमा ‘७ करोड’ भनेर कराउँछन्।” उनको यो टिप्पणीले शो का दर्शकहरूलाई खुब हँसायो। यो सुनेर अमिताभले पनि ठट्टा गर्दै “यिनलाई यहाँ बोलाएर मैले गल्ती गरेँ” भनेपछि, बुबा–छोराको यो रमाइलो संवादले सबैलाई मुग्ध बनायो।
‘आई वान्ट टु टक’ को ट्रेलरले जित्दै दर्शकको मन
रोनी लाहिरी र शील कुमारको निर्माणमा बनेको ‘आई वान्ट टु टक’ यही नोभेम्बर २२ मा रिलिज हुँदैछ। फिल्ममा अभिषेकले अर्जुन नामक पात्रको मार्मिक र प्रेरणादायी कथा प्रस्तुत गर्दैछन्। यस फिल्मलाई चर्चित निर्देशक सुजित सिरकारले निर्देशन गरेका हुन्। फिल्मको ट्रेलरले दर्शकहरूबाट अत्यधिक सकारात्मक प्रतिक्रिया पाइरहेको छ, जसले अभिषेकका फ्यानहरूको उत्सुकता थप बढाएको छ।
रोचक कुरा के छ भने, यो सुजित सिरकार र अभिषेक बच्चनको पहिलो सहकार्य हो, जबकि सुजितले अमिताभसँग यसअघि चार वटा फिल्ममा काम गरिसकेका छन्। अभिषेक र सुजितको यो सहकार्यलाई पनि दर्शकहरूले निकै चासोका साथ हेरिरहेका छन्।
‘आई वान्ट टु टक’ मा अभिषेकले प्रस्तुत गर्ने अर्जुनको संघर्षले दर्शकलाई प्रेरित गर्ने अपेक्षा गरिएको छ।
