राँझा (बाँके), १६ पुसः बाँकेका तारे होटलहरूले अङ्ग्रेजी नयाँ वर्ष २०२५ को स्वागतमा आन्तरिक पर्यटन प्रवर्द्धन गर्न विशेष कार्यक्रम आयोजना गर्ने भएका छन्।
नयाँ वर्षका अवसरमा आन्तरिक तथा बाह्य पर्यटकलाई लक्षित गर्दै होटल तथा पर्यटन व्यवसायीहरूले विभिन्न आकर्षक प्याकेज, साङ्गीतिक र सांस्कृतिक कार्यक्रम तय गरेका छन्। “पर्यटन व्यवसायलाई चलायमान बनाउन परिस्थिति सुधारको पर्खाइभन्दा अग्रसर भएर केही गर्नुपर्ने आवश्यकता देखिएको छ,” होटल स्टार लाइट, नेपालगञ्जका फ्रन्ट म्यानेजर विनोद बुढाथोकीले बताउनुभयो। “नयाँ वर्षको अवसरमा नियमित पाहुनालाई होटलसम्म ल्याएर रमाइलो वातावरण सिर्जना गर्न खोजेका छौँ।”
उहाँका अनुसार, होटल स्टार लाइटले साङ्गीतिक माहोल र पारिवारिक वातावरणका साथ सहुलियतपूर्ण तर आकर्षक प्याकेज ल्याएको छ। लागत मूल्यमा ‘लाइभ फुड’, ‘अनलिमिटेड स्न्याक्स’, ‘बुफे डिनर’, लोकप्रिय पपगायक सञ्जय श्रेष्ठ, लोकगायिका इब्सु सञ्ज्यालको देउडा गीत, र ‘द स्याड ब्याण्ड’को लाइभ प्रस्तुति आयोजना गरिनेछ।
पाँचतारे होटल सोल्टी, नेपालगञ्जले नयाँ वर्षलाई भव्य बनाउन कलाज्ञ ब्याण्ड निम्त्याएको छ। ‘लाइभबार’, ‘फुड काउन्टर’, र अन्य आकर्षक प्याकेजका साथै आकर्षक पुरस्कार पनि राखिएको छ।
कोहलपुरस्थित सेन्ट्रल प्लाजाले चर्चित गायक शिव परियार र नेपाल आइडल करण परियारको प्रस्तुति ३१ डिसेम्बरको रातका लागि तय गरेको छ।
डायमण्ड प्यालेस लर्डस् प्लाजाले बलिउड शैलीमा ‘न्यू इयर इभ’ आयोजना गर्ने जनाएको छ।
होटल सिद्धार्थले गायिका रचना रिमालसहितको साङ्गीतिक प्रस्तुति आयोजना गर्दै आन्तरिक पर्यटन प्रवर्द्धनमा योगदान दिने योजना बनाएको सेल्स एण्ड मार्केटिङ म्यानेजर नवीन भट्टले बताउनुभयो।
कल्पतरु होटलले पनि नयाँ वर्ष २०२५ को स्वागतमा गायिका प्रतिक्षा र उनको ब्याण्डद्वारा साङ्गीतिक कार्यक्रमसहित विभिन्न परिकार प्रस्तुत गर्ने योजना बनाएको छ।
होटल ग्यालेक्सी दरबारले लाइभ म्युजिक र विविध परिकारसहित सहुलियत दरका आकर्षक प्याकेज ल्याएको छ। ‘न्यू इयर इभ’मा जुना द टिम ब्याण्डको लाइभ म्युजिक र स्वादिष्ट खानाका साथ निःशुल्क प्रवेशको व्यवस्था गरिएको ग्यालेक्सी दरबारका प्रबन्धक हस्तबहादुर हिमालले जानकारी दिनुभयो।
