काठमाडौं । आज असार शुक्ल पूर्णिमा अर्थात् गुरु पूर्णिमा देशभर श्रद्धा, सम्मान र भक्तिभावका साथ मनाइँदै छ। ज्ञान, शिक्षा, संस्कार र जीवनलाई सही मार्गमा डोर्याउने गुरुजनप्रति कृतज्ञता व्यक्त गर्ने दिनका रूपमा यस पर्वलाई विशेष महत्व दिइन्छ।
वैदिक सनातन परम्पराअनुसार यस अवसरमा गुरुको पूजा, सम्मान तथा आशीर्वाद ग्रहण गर्ने चलन रहेको छ। साथै, गायत्री मन्त्रको जप, दीक्षा तथा वेद–शास्त्रको अध्ययन र आध्यात्मिक साधनासँग पनि यो दिन विशेष रूपमा जोडिएको मानिन्छ।
गुरु पूर्णिमाका अवसरमा विद्यालय, शैक्षिक संस्था, आश्रम तथा धार्मिक स्थलहरूमा विभिन्न कार्यक्रम आयोजना गरी शिक्षक, आध्यात्मिक गुरु तथा जीवनमा प्रेरणा र मार्गदर्शन दिने व्यक्तित्वहरूप्रति सम्मान प्रकट गरिन्छ।
ज्ञान, अनुशासन, नैतिकता र संस्कारको महत्व स्मरण गराउँदै गुरु–शिष्य सम्बन्धलाई थप सुदृढ बनाउने सन्देशका साथ आज गुरु पूर्णिमा मनाइँदै छ।
