काठमाडौं । मुस्लिम धर्मावलम्बीहरूले आज बकर इद (इदुल जोहा) पर्व देशभर श्रद्धा र उत्साहका साथ मनाइरहेका छन्। यस अवसरमा देशभरका मस्जिद तथा इदगाहहरूमा विशेष प्रार्थना र धार्मिक कार्यक्रम आयोजना गरिएको छ।
मुस्लिम समुदायमा बकर इदका दिन बिहान स्नान गरी नजिकैको मस्जिद वा इदगाहमा पुगेर सामूहिक नमाज पढ्ने परम्परा रहेको छ। नमाजपछि एकअर्काबीच शुभकामना आदानप्रदान गर्ने चलन पनि रहेको छ।
काठमाडौंस्थित नेपाली जामे मस्जिद, काश्मिरी मस्जिद लगायत देशभरका मस्जिद तथा इदगाहहरूमा बिहानैदेखि मुस्लिम धर्मावलम्बीहरूको उल्लेख्य उपस्थिति देखिएको छ।
बकर इदलाई त्याग, बलिदान, आस्था र सामाजिक सद्भावको पर्वका रूपमा मनाउने गरिन्छ।
