काठमाडौँ । धेरै मानिसले फाइबरको राम्रो स्रोतका रूपमा केरालाई चिन्ने गरेका छन् । तर, केही यस्ता फल पनि छन्, जसमा केराभन्दा बढी फाइबर पाइन्छ । फाइबर शरीरका लागि आवश्यक पोषक तत्त्व हो, जसले पाचन प्रणाली सुधार गर्न, कब्जियत कम गर्न र पेट लामो समयसम्म भरिएको महसुस गराउन मद्दत गर्दछ ।
विज्ञहरूका अनुसार अधिकांश मानिसले दैनिक आवश्यकताभन्दा कम फाइबर सेवन गर्ने गरेका छन् । त्यसैले आहारमा फाइबरयुक्त फलफूल समावेश गर्नु स्वास्थ्यका लागि लाभदायक हुन सक्छ ।
किवी
किवी सानो फल भए पनि फाइबरको राम्रो स्रोत मानिन्छ । १०० ग्राम किवीमा केराभन्दा बढी फाइबर पाइन्छ । दुईवटा किवीबाट करिब ४ देखि ५ ग्राम फाइबर प्राप्त गर्न सकिन्छ । किवीले कब्जियत र पेटसम्बन्धी असुविधा कम गर्न सहयोग पुर्याउने विश्वास गरिएको छ । यसको हल्का अमिलो स्वाद दही, स्मुदी र फ्रुट बाउलसँग राम्रोसँग मिल्छ ।
स्याउ
स्याउलाई स्वस्थ खाजाका रूपमा लिइन्छ । विशेषगरी यसको बोक्रामा राम्रो मात्रामा फाइबर पाइन्छ । एउटा मध्यम आकारको स्याउले शरीरलाई ४ ग्रामभन्दा बढी फाइबर दिन सक्छ । यसमा रहेको पेक्टिन नामक घुलनशील फाइबरले पेटका राम्रो ब्याक्टेरियाको वृद्धि गर्न मद्दत गर्दछ ।
ब्लुबेरी
ब्लुबेरी आकारमा सानो भए पनि फाइबर र एन्टिअक्सिडेन्टले भरिपूर्ण हुन्छ । एक कप ब्लुबेरीमा करिब ३ दशमलव ५ ग्राम फाइबर पाइन्छ । केही अनुसन्धानले ब्लुबेरीले पेटको समस्या र सुन्निएको कम गर्न सहयोग गर्न सक्ने देखाएका छन् । यसलाई स्मुदी, ओट्स र दहीसँग मिसाएर खान सकिन्छ ।
लहरे आँप (प्यासन फ्रुट)
लहरे आँप नेपालमा धेरै पाइँदैन, तर यसलाई फाइबरयुक्त फलका रूपमा चिनिन्छ । दुईवटा लहरे आँपमा करिब ४ ग्राम फाइबर पाइन्छ । यसमा भिटामिन ‘ए’ र भिटामिन ‘सी’ पनि प्रशस्त मात्रामा हुन्छ । यसको स्वाद हल्का अमिलो र मीठो हुने भएकाले स्मुदी र विभिन्न मिठाईमा प्रयोग गरिन्छ ।
फाइबर बढाउने सजिलो उपाय
फलफूलसँगै दाल, सिमी, तरकारी र सम्पूर्ण अन्न पनि फाइबरका राम्रो स्रोत हुन् । बिहानको खानादेखि नै फाइबरयुक्त परिकार समावेश गर्दा शरीरले दिनभरि यसको फाइदा लिन सक्छ ।
विभिन्न रंगका फलफूल र तरकारी नियमित रूपमा खानाले शरीरलाई आवश्यक धेरै पोषक तत्त्व प्राप्त हुन्छन् ।
