काठमाडौं। भारतमा आम आदमी पार्टी (आप) का ७ जना राज्यसभा सांसद भारतीय जनता पार्टी (भाजपा) मा सामेल भएका छन्। यससँगै राज्यसभामा भाजपा सांसदहरूको संख्या ११३ पुगेको छ, जसमध्ये ५ जना राष्ट्रपतिद्वारा मनोनीत सदस्य रहेका छन्।
भाजपामा प्रवेश गर्ने सांसदहरूमा अशोक कुमार मित्तल, राघव चड्ढा, हरभजन सिंह, सन्दीप कुमार पाठक, विक्रमजीत सिंह साहनी, स्वाती मालीवाल र राजेन्द्र गुप्ता रहेका छन्।
शुक्रबार राघव चड्ढा र सन्दीप पाठकले भाजपा प्रवेशको घोषणा गरेका थिए। पार्टी अध्यक्ष नितिन नवीनले उनीहरूलाई मिठाई खुवाएर स्वागत गरेका थिए। सात सांसद बाहिरिएपछि आम आदमी पार्टीमा अब केवल तीन सांसद—संजय सिंह, नारायण दास गुप्ता र सन्त बलबीर सिंह—मात्र बाँकी रहेका छन्।
आम आदमी पार्टीका नेता संजय सिंहले सांसदहरूको दलबदलप्रति कडा असन्तुष्टि जनाउँदै उक्त निर्णयलाई अवैध बताएका छन्। उनले राघव चड्ढासहित सातै जनाको सदस्यता रद्द गर्न माग गरेका छन्।
उनले भाजपाले नियमविपरीत काम गरेको आरोप लगाए पनि ती सांसदहरूलाई भाजपामा सामेल हुन स्वीकृति दिइएको छ।
यसैबीच, आम आदमी पार्टीका नेता तथा पञ्जाबका मुख्यमन्त्री भगवन्त मानले राघव चड्ढालाई “देशद्रोही” भन्दै आलोचना गरेका छन्।
