काठमाडौं । राष्ट्रपति रामचन्द्र पौडेलले आमजनमानसमा भूकम्पीय जोखिम न्यूनीकरणका प्रभावकारी उपाय, पूर्वतयारी, प्रतिकार्य तथा सुरक्षात्मक उपायसम्बन्धी जनचेतना फैलाउनुपर्ने आवश्यकता औँल्याएका छन्।
११औँ भूकम्प स्मृति दिवसका अवसरमा सन्देश जारी गर्दै उनले प्राकृतिक प्रकोपको उच्च जोखिममा रहेको नेपालमा भूकम्पीय जोखिम न्यूनीकरणका लागि सचेतना अभिवृद्धि अत्यन्त आवश्यक रहेको बताएका हुन्। यसतर्फ सम्बन्धित निकायले विशेष ध्यान दिनुपर्ने उनले उल्लेख गरेका छन्।
राष्ट्रपति पौडेलले गोरखाको बारपाक केन्द्रविन्दु भई १२ वैशाख २०७२ मा गएको विनाशकारी भूकम्प तथा त्यसपछिका पराकम्पमा ज्यान गुमाउनेहरूप्रति श्रद्धाञ्जली अर्पण गरेका छन्।
भूकम्प रोक्न नसकिने भए पनि त्यसबाट हुने क्षति न्यूनीकरण गर्न पूर्वतयारी, सुरक्षित निर्माण र सतर्कता अत्यावश्यक रहेको उनले बताएका छन्। तीव्र शहरीकरणका कारण प्रत्येक वर्ष भूकम्पीय जोखिम बढ्दै गएको उनको भनाइ छ।
नेपालको भौगोलिक अवस्थिति, भौतिक संरचनाको प्रकृति तथा मानव निर्मित पूर्वाधारहरू भूकम्पीय जोखिमका प्रमुख कारण भएकाले सुरक्षित निर्माणलाई प्राथमिकता दिनुपर्ने उनले उल्लेख गरेका छन्।
नवनिर्मित तथा पुनर्निर्मित संरचनामा मौलिकता झल्किनुका साथै भूकम्प प्रतिरोधात्मक प्रविधिको प्रयोग गर्नुपर्नेमा जोड दिँदै उनले पुनर्निर्माण तथा पुनःस्थापनामा सहयोग गर्ने सबैप्रति धन्यवाद व्यक्त गरेका छन्।
