तेहरान । इरानले अमेरिकी नौसेनाको नाकाबन्दी जारी रहेसम्म स्ट्रेट अफ होर्मुज पुनः नखोल्ने स्पष्ट अडान लिएको छ।
युद्धविराम लम्ब्याइए पनि व्यवहारमा उल्लङ्घन भइरहेको आरोप लगाउँदै इरानले उक्त रणनीतिक जलमार्गमा नियन्त्रण कडा बनाएको छ र दुई विदेशी जहाज नियन्त्रणमा लिएको जनाएको छ।
यसैबीच क्षेत्रीय तनाव बढ्दै जाँदा डोनाल्ड ट्रम्पले युद्धविराम केही समय कायम राख्ने घोषणा गर्दै पाकिस्तानको मध्यस्थतामा शान्ति वार्तालाई अवसर दिन चाहेको बताएका छन्। इरानले पाकिस्तानको पहललाई स्वागत गरे पनि अमेरिकी घोषणाबारे थप प्रतिक्रिया दिएको छैन।
इस्लामाबादमा भएको प्रारम्भिक वार्तामा इरानी टोलीका प्रमुख मोहम्मद बाघेर घालीबाफले नाकाबन्दी जारी रहँदा युद्धविरामको अर्थ नरहने बताएका छन्।
फेब्रुअरी २८ मा इजरायल र संयुक्त राज्य अमेरिकाले इरानमाथि आक्रमण गरेपछि तेल बजारमा अस्थिरता बढेको छ। युद्ध पुनः भड्किने आशंकाले मूल्य उकालो लागिरहेको छ।
इरानले इस्लामिक रिभोलुसनरी गार्ड कर्प्समार्फत होर्मुज हुँदै जाने दुई जहाज नियन्त्रणमा लिएको जनाएको छ। समुद्री निगरानी संस्थाहरूले पनि उक्त क्षेत्रमा सैन्य गतिविधि बढेको पुष्टि गरेका छन्।
यसैबीच पेन्टागनले अमेरिकी नौसेनाका सचिव जोन फेलानले पद छोड्ने घोषणा गरेको जनाएको छ, यद्यपि कारण खुलाइएको छैन।
इरानले अब होर्मुज हुँदै आवतजावत गर्ने जहाजहरूले अनुमति लिनुपर्ने व्यवस्था लागू गरेको छ। दुवै पक्षले एकअर्कामाथि युद्धविराम उल्लंघनको आरोप लगाइरहेका छन्।
उता, इजरायल–लेबनान सीमा क्षेत्रमा पनि तनाव जारी छ। आक्रमणमा थप जनधन क्षति भएको जनाइएको छ। इमानुएल म्याक्रोनले संयुक्त राष्ट्रसंघका शान्तिरक्षकहरूमाथि भएको आक्रमणमा एक फ्रान्सेली सैनिकको मृत्यु भएको जानकारी दिएका छन्।
क्षेत्रीय तनाव बढिरहेकाले कूटनीतिक प्रयास जारी रहे पनि स्थिति अझै संवेदनशील बनेको छ।
