काठमाडौँ । चितवन जिल्ला अदालतले राष्ट्रिय स्वतन्त्र पार्टी (रास्वपा) का सभापति रवि लामिछानेलाई सहकारी ठगीसम्बन्धी मुद्दामा वारेस राख्ने अनुमति दिएको छ।
जिल्ला न्यायाधीश केदारनाथ पौडेलको इजलासले लामिछानेको निवेदनमाथि सुनुवाइ गर्दै वारेस राख्ने सुविधा प्रदान गरेको हो।
लामिछानेले स्वास्थ्य समस्या देखाउँदै आफू अदालतमा उपस्थित हुन असमर्थ रहेको उल्लेख गरेका थिए। उनले त्रिभुवन विश्वविद्यालय शिक्षण अस्पतालको स्वास्थ्य परीक्षण प्रतिवेदन पनि अदालतमा पेस गरेका थिए।
उक्त प्रतिवेदन र निवेदनको आधारमा अदालतले वारेसमार्फत मुद्दाको तारिखमा उपस्थित हुन सक्ने व्यवस्था मिलाइदिएको हो। अब लामिछानेलाई मुद्दाका हरेक पेशीमा स्वयं चितवन अदालत जानुपर्ने छैन।
