काठमाडौं । गृह मन्त्रालयले सामाजिक सञ्जालमा प्रधानमन्त्रीविरुद्ध गालीगलौजपूर्ण अभिव्यक्ति दिएको आरोपमा पाँचथरका एक युवालाई प्रहरीले नियन्त्रणमा लिएको विषयमा ध्यानाकर्षण जनाएको छ। आइतबार जारी विज्ञप्तिमा मन्त्रालयले ती युवालाई हालका लागि परिवारको जिम्मा लगाइएको जानकारी दिएको छ।
मन्त्रालयले संविधानले प्रत्याभूत गरेको अभिव्यक्ति स्वतन्त्रता र प्रेस स्वतन्त्रताको पूर्ण सम्मान गर्ने पुनः स्पष्ट पार्दै आफ्ना विचार व्यक्त गर्दा सभ्य, मर्यादित र जिम्मेवार हुनुपर्नेमा जोड दिएको छ। साथै, समाजमा अशान्ति फैलाउने, व्यक्तिको मानमर्दन गर्ने वा अपशब्द प्रयोग गरी गालीगलौज गर्ने जस्ता गतिविधि प्रचलित कानूनविपरीत रहेको उल्लेख गरेको छ।
विज्ञप्तिमा सरकार नागरिकको मौलिक हक र अधिकारको संरक्षणमा सधैं प्रतिबद्ध रहेको जनाउँदै यस्ता अवाञ्छित क्रियाकलापमा सम्बन्धित निकायले नियमित निगरानी गरिरहेको जानकारी दिइएको छ।
