काठमाडौं । देशको न्यायपालिकाले दोस्रो पटक महिला नेतृत्व पाउने भएको छ। न्यायाधीश सपना प्रधान मल्ल भोलिदेखि कायममुकायम प्रधानन्यायाधीशको रूपमा सर्वोच्च अदालतको नेतृत्व सम्हाल्नेछिन्।
वर्तमान प्रधानन्यायाधीश प्रकाशमानसिंह राउत आजदेखि उमेरहदका कारण अवकाशमा जाँदैछन्। ६५ वर्ष पूरा भएसँगै सर्वोच्च अदालतका न्यायाधीशहरू स्वतः अवकाशमा जाने संवैधानिक व्यवस्था छ।
यसअघि पनि न्यायपालिकाले महिला नेतृत्व पाइसकेको छ। पूर्व प्रधानन्यायाधीश सुशीला कार्कीको कार्यकालमा देशका महत्वपूर्ण संवैधानिक पदहरूमा महिलाको उल्लेखनीय उपस्थिति देखिएको थियो।
नयाँ प्रधानन्यायाधीश नियुक्तिका लागि न्यायपरिषदले योग्य ६ न्यायाधीशको नाम सिफारिस गरिसकेको छ, जसमा सपना प्रधान मल्लको नाम अग्रस्थानमा रहेको छ। तर, संवैधानिक परिषद पूर्ण नभएकाले तत्काल नियुक्ति प्रक्रिया अघि बढ्न सकेको छैन।
हाल संवैधानिक परिषदमा आवश्यक सदस्य संख्या नपुगेकाले बैठक बस्न सक्ने अवस्था छैन। प्रधानमन्त्री, राष्ट्रिय सभा अध्यक्ष र कानुनमन्त्री मात्र पदमा छन् भने सभामुख, उपसभामुख र विपक्षी दलका नेता पद रिक्त छन्।
प्रतिनिधि सभाको बैठक चैत १९ गतेका लागि बोलाइएको छ। उक्त बैठकबाट सभामुख र उपसभामुख चयन प्रक्रिया अघि बढ्ने अपेक्षा गरिएको छ। साथै, नेपाली कांग्रेसले संसदीय दलको नेता चयन गरेपछि विपक्षी दलका नेताको पद पनि पूर्ति हुनेछ।
सम्पूर्ण पदहरू पूर्ति भएपछि संवैधानिक परिषदको बैठक बस्नेछ र नयाँ प्रधानन्यायाधीश सिफारिस गरिनेछ। त्यसपछि संसदीय सुनुवाइ समितिको अनुमोदन पश्चात् राष्ट्रपतिबाट औपचारिक नियुक्ति हुनेछ।
