काठमाडौं। रवि लामिछानेको सम्पत्ति शुद्धीकरण तथा संगठित अपराध सम्बन्धी कसुर संशोधनविरुद्ध परेको मुद्दा अब पूर्ण इजलासमा सुनुवाइ हुने भएको छ।
सर्वोच्च अदालतका न्यायाधीशद्वय विनोद शर्मा र अब्दुल अजीज मुसलमानको इजलासले उक्त मुद्दा पूर्ण इजलासमा पठाउने आदेश दिएको हो।
यसअघि न्यायाधीश सारंगा सुवेदी र सुनिलकुमार पोखरेलको इजलासले चार दिनसम्म सुनुवाइ गर्दै लामिछानेबाहेकका हकमा महान्यायाधिवक्ता कार्यालयले गरेको निर्णयसम्बन्धी फाइल झिकाउन आदेश दिएको थियो।
महान्यायाधिवक्ताले लामिछानेसम्बन्धी दुई वटा मुद्दामा कसुर संशोधन गर्ने निर्णय गरेकी थिइन्। सो निर्णयविरुद्ध परेको रिट निवेदनमा सुनुवाइ सकिएपछि पूर्ण इजलासमा पठाउने आदेश आएको हो।
यसैबीच, उक्त रिटको आधार देखाउँदै सरकारी वकिलले दायर गरेको संशोधन निवेदनमा कास्की जिल्ला अदालत र रूपन्देही जिल्ला अदालतले पनि निर्णय नगर्ने आदेश दिएका छन्।
रिट निवेदनमा लामिछानेविरुद्ध कारागार ऐन, संगठित अपराध तथा सम्पत्ति शुद्धीकरणसँग सम्बन्धित गम्भीर आरोपहरू रहेको उल्लेख गर्दै ती मुद्दाहरूलाई कमजोर पार्ने कार्य नगर्न परमादेश जारी गर्न माग गरिएको छ।
