काठमाडौं । पूर्वप्रधानमन्त्री केपी शर्मा ओलीलाई भर्चुअल (भिडियो कन्फ्रेन्सिङ) माध्यमबाट अदालतमा उपस्थित गराउने तयारी गरिएको छ।
जिल्ला अदालत काठमाडौंका रजिष्टार तीर्थराज अधिकारीका अनुसार ओलीको स्वास्थ्य अवस्थाका कारण उनलाई भौतिक रूपमा अदालतमा उपस्थित गराउन नसकिने भएकाले भिडियो कन्फ्रेन्सिङमार्फत उपस्थित गराइने भएको हो।
शनिबार बिहान गुन्डुस्थित निवासबाट पक्राउ परेका ओली हाल त्रिवि शिक्षण अस्पतालमा उपचाररत छन्। शनिबार साँझ र आइतबार बिहान गरिएको स्वास्थ्य परीक्षणपछि चिकित्सकहरूले उनलाई अस्पतालमै राखेर उपचार गर्न सुझाव दिएका थिए।
स्वास्थ्य अवस्थालाई मध्यनजर गर्दै अदालतले वैकल्पिक रूपमा भर्चुअल उपस्थितिको व्यवस्था मिलाएको जनाएको छ।
